Բարտոմեուն պատմել է, թե ինչպես է Նեյմարի տեղափոխությունն ազդել Բարսելոնայի բյուջեի վրա
«Բարսելոնայի» նախկին նախագահ Ժոզեպ Բարտոմեուն պատմել է, թե ինչ ազդեցություն է ունեցել Նեյմարի՝ 2017 թվականին ՊՍԺ տեղափոխությունը կատալոնական ակումբի ֆինանսական վիճակի վրա։
«Նեյմարի հեռացումից հետո աշխատավարձային ֆոնդը կտրուկ աճեց։ ՊՍԺ-ն գայթակղեց նրան՝ վճարելով պայմանագրով նախատեսված հրաժարագինը։ Այդ ժամանակից ի վեր մենք սկսեցինք պայքարել մյուս խաղացողներին պահելու համար, քանի որ պետական աջակցություն ունեցող ակումբները և Պրեմիեր լիգան տիրապետում են հսկայական ֆինանսական միջոցների։
Պրեմիեր լիգան մեզ դիմակայում էր իր տնտեսական ուժով։ Արդյունքում մենք երկարաձգեցինք որոշ պայմանագրեր, որպեսզի կանխենք մեր խաղացողների հեռացումը։
Ավելին, անհրաժեշտ էր բարձրացնել ոչ միայն աշխատավարձերը, այլև հրաժարագնի չափը։ Մենք Մեսսիի հրաժարագինը 400 միլիոնից հասցրինք 700 միլիոնի, բարձրացրինք նաև Ալբայի և Բուսկետսի հրաժարագները, որպեսզի այլ ակումբներ չգայթակղվեն մեր տաղանդներին տանելու մտքով», – ասել է Բարտոմեուն։
