Գոլեր՝ միայն 11-մետրանոցից. ի՞նչ արդյունքներ են գրանցվել Առաջին խմբում

Հայաստանի Առաջին խմբի առաջնության 21-րդ տուրում այսօր կայացավ երեք հանդիպում:

Առաջնության առաջատար «Սարդարապատն» Արմավիրում 2:0 հաշվով հաղթեց «Լեռնային Արցախին»: Այդ խաղում արմավիրցիները հանդես էին գալիս հյուրի կարգավիճակով: Երկու անգամ 11-մետրանոց հարվածով աչքի ընկավ Համլետ Մինասյանը: Հարձակվողն իր գոլերի թիվը հասցրեց 18-ի և այժմ ընդամենը 2 գոլով է հետ մնում լավագույն ռմբարկու Իսմաել Օլավալեից, որն «Անդրանիկի» կազմում դարձել է 20 գոլի հեղինակ:

«Սարդարապատը» 53 միավորով էլ ավելի ամրապնդվեց առաջին հորիզոնականում: ԲԿՄԱ-2-ը, որի հանդիպումը «Արարատ-2»-ի հետ հետաձգվել է, 48 միավորով երրորդն է, իսկ «Սյունիքն» ունի 49 միավոր:

Օրվա մյուս խաղերից մեկում «Հայքը» Գյումրիում 1:0 հաշվով հաղթել է «Շիրակ-2»-ին: Միակ գոլը խփել է «Շիրակի» նախկին հարձակվող Ռազմիկ Հակոբյանը. նա նույնպես աչքի է ընկել 11-մետրանոցից: «Հայքը» 46 միավորով բարձրացել է չորրորդ տեղ:

Տուրի վերջին խաղում «Նոա-2»-ը և «Արաքսը» գրանցել են գոլազուրկ՝ 0:0 հաշվով ոչ-ոքի: