Շվեդիայում 20-ամյա ֆուտբոլիստ է սպանվել

20-ամյա շվեդ դարպասապահ Հյուգո Մոսշագենը սպանվել է Շվեդիայի Էրեբրո քաղաքում տեղի ունեցած կրակոցների ժամանակ, հաղորդում է Aftonbladet-ը։

Դեպքը տեղի է ունեցել մարտի 21-ի երեկոյան քաղաքի արևմտյան մասում գտնվող կայանատեղիում։ Ոստիկանությունն ահազանգը ստացել ժամը 23:20-ին և դեպքի վայրում գտել վիրավոր տղամարդու, որը հետագայում մահացել է։

«Մենք հետաքննում ենք լուրջ հանցագործություն։ Սա հաստատված կրակոց է», - ասել է հերթապահ Պետեր Անդերսոնը։

Դեռևս կասկածյալներ չկան։ Հետաքննությունը Մոսշագենի և հանցավոր խմբավորումների միջև կապ չի հայտնաբերել։ Դեպքը դասակարգվել է որպես սպանություն և զենքի մասին օրենքների խախտում։ Դրդապատճառը մնում է անհայտ։ Վարկածներից մեկի համաձայն՝ կրակոցը սխալմամբ է տեղի ունեցել: Նախատեսված թիրախը կարող էր լինել նրա շրջապատի մեկ այլ անդամ։

Հարձակման պահին Մոսշագենը գտնվել է առնվազն մեկ ծանոթի հետ։ Նա խաղացել է Շվեդիայի չորրորդ դիվիզիոնի ակումբի՝ «Ֆորվարդի» գլխավոր թիմում։