Բարսելոնան լուրջ կորուստով է մոտենում ՉԼ-ում Ատլետիկոյի հետ դիմակայությանը

«Բարսելոնան» հայտարարություն է տարածել Ռաֆինյայի վնասվածքի վերաբերյալ, որը նա ստացել էր Բրազիլիայի հավաքականի կազմում։

«Ռաֆինյան ստացել է աջ ազդրի հետին մկանի վնասվածք, ինչը հաստատել են Բրազիլիայի ֆուտբոլի կոնֆեդերացիայի (CBF) կողմից իրականացված բժշկական հետազոտությունները՝ Բրազիլիա-Ֆրանսիա խաղի ժամանակ նրա զգացած անհանգստությունից հետո։

Ռաֆինյան վերադարձել է Բարսելոնա՝ անհրաժեշտ բուժումը սկսելու համար։ Ապաքինման ենթադրյալ ժամկետը կազմում է հինգ շաբաթ»,— ասված է «կապտանռնագույնների» հայտարարության մեջ։

Ռաֆինյան փոխարինվել էր Ֆրանսիայի դեմ ընկերական խաղի (1:2) ընդմիջմանը։

Այսպիսով, բրազիլացին բաց կթողնի Լա Լիգայի Մադրիդի «Ատլետիկոյի», «Էսպանյոլի», «Սելտայի», «Խետաֆեի» դեմ հանդիպումներն ու Չեմպիոնների լիգայի քառորդ եզրափակիչի Մադրիդի «Ատլետիկոյի» դեմ դիմակայության 2 խաղերը։