Ռուսաստանը կարող է մրցել Արգենտինայի հետ. Նիկարագուայի մարզիչը Կրասնոդարում կայացած խաղը պատմական է որակել
Նիկարագուայի ազգային հավաքականի գլխավոր մարզիչ Օտոնիել Օլիվասը մեկնաբանել է Ռուսաստանի ընտրանուց կրած պարտությունը (1:3) և կիսվել իր տպավորություններով։
Մարզիչը բարձր է գնահատել մրցակցի մակարդակը՝ նշելով, որ Ռուսաստանն ունի արտակարգ պատրաստվածություն և կարող է հավասարը հավասարի պես մրցակցել այնպիսի թիմերի հետ, ինչպիսիք են ԱՄՆ-ն ու Արգենտինան։
«Մենք խաղացել ենք ԱՄՆ-ի, Արգենտինայի հետ, ուստի կարող եմ ասել, որ Ռուսաստանն ունի արտակարգ մակարդակ և կարող է մրցակցել այդ հավաքականների հետ։ Մենք դեռ հեռու ենք նման մակարդակից, դրա համար սա մեզ համար զարգանալու հիանալի հնարավորություն է»,-նշել է Օլիվասը։
Մարզիչը շնորհակալություն է հայտնել Ռուսաստանի հավաքականին ընձեռված հնարավորության համար՝ շեշտելով, որ այս հանդիպումը Նիկարագուայի համար պատմական իրադարձություն է։
Խոսելով հնարավոր պատասխան խաղի մասին՝ Օլիվասը նշել է, որ Նիկարագուայում ռևանշ-հանդիպում անցկացնելն ուղղակի իդեալական կլիներ, եթե ռուսական կողմը հետաքրքրված լինի դրանով։ Նա ընդգծել է, որ նման ուժեղ մրցակիցների հետ խաղերն օգնում են իրենց երկրում ֆուտբոլի աճին, չնայած որ մարզչական շտաբի համար դա մեծ պատասխանատվություն և ծանր աշխատանք է՝ հաշվի առնելով, որ Ռուսաստանը, ըստ նրա, աշխարհի լավագույն հավաքականներից մեկն է։
