Ֆուտբոլը փոխվում է. ի՞նչ է Վենգերի խաղից դուրսը և ինչպե՞ս են մարզիչներն ազդելու մրցավարների վրա

FIFA-ն հայտարարել է Կանադայի Պրեմիեր լիգայում «Վենգերի խաղից դուրս վիճակի» և մարզչական հարցումների համակարգի (FVS) թեստավորման մեկնարկի մասին։

Փորձարկումները կսկսվեն ապրիլի 4-ից, երբ Կանադայում կմեկնարկի նոր մրցաշրջանը։ Ավելի վաղ, այս որոշումն ընդունվել էր Ֆուտբոլային ասոցիացիաների միջազգային խորհրդի (IFAB) ժողովում, իսկ այժմ այն հաստատվել է FIFA-ի կողմից։

«Սա կարևոր պիլոտային նախագիծ է։ Պրոֆեսիոնալ մրցաշարերում այս նոր կանոնը փորձարկելով՝ մենք կկարողանանք ավելի լավ հասկանալ դրա ազդեցությունը, այդ թվում՝ խաղի հստակության և դինամիկայի բարձրացման, ինչպես նաև հարձակողական ֆուտբոլի խթանման տեսանկյունից։ Մենք անհամբերությամբ սպասում ենք արդյունքների վերլուծությանը», — ասել է «Արսենալի» նախկին մարզիչ Արսեն Վենգերը, որն այժմ զբաղեցնում է FIFA-ի ֆուտբոլի գլոբալ զարգացման բաժնի ղեկավարի պաշտոնը։

Ավելի վաղ Վենգերն առաջարկել էր խաղից դուրս վիճակ չֆիքսել, եթե մարմնի գեթ մեկ (ցանկացած) մասը, որով կարելի է գոլ խփել, գտնվում է վերջին պաշտպանի գծի վրա կամ դրանից հետո, նույնիսկ եթե մարմնի մնացած մասերը հատում են այդ գիծը։ «Խաղից դուրս» վիճակն այս դեպքում կհաշվվի միայն այն դեպքում, եթե խաղացողն ամբողջ մարմնով ավելի մոտ է մրցակցի դարպասային գծին, քան գնդակը և մրցակցի նախավերջին խաղացողը։

Մարզչական հարցումների համակարգը (FVS) թույլ է տալիս մարզիչներին կատարել տեսակրկնապատկերների դիտման սահմանափակ քանակությամբ հարցումներ, եթե նրանք համարում են, որ առանցքային պահերին (գոլեր, 11-մետրանոցներ, ուղիղ կարմիր քարտեր) թույլ է տրվել ակնհայտ սխալ։ Բացի այդ, այս համակարգի շրջանակներում պահեստային մրցավարը ստուգում է յուրաքանչյուր խփված գոլ՝ գրոհի զարգացման պահին հնարավոր խախտումը պարզելու համար։ Այս համակարգը չի փոխարինում VAR-ին, այլ դիտարկվում է որպես դրա ավելի մատչելի այլընտրանք։