Սա մեր բոլորի հաղթանակն է. ֆուտզալի հավաքականի ավագը՝ Եվրո-2026-ի եզրափակիչ փուլ դուրս գալու մասին
Ֆուտզալի ազգային հավաքականի ավագ Վլադիմիր Սանոսյանը ՀՖՖ TV-ի հետ զրույցում ամփոփել է Ղազախստանի նկատմամբ տարած հաղթանակը:
«Մեզ մեր մարզչի վստահությունը շատ է օգնում: Խաղից հետո, իհարկե, հեշտ է ասելը, բայց խաղից առաջ էլ ոչ ոք չէր կասկածում, որ մենք կանցնենք հաջորդ փուլ: 2-3 ամիս կարող ենք ուրախանալ, բայց հետո պետք է մոռանանք այս խաղերն ու սկսենք նախապատրաստվել եզրափակիչ փուլին՝ բոլոր ուժերը պահելով այդ փուլի համար: Սա մեզ համար պատմություն է, ու շատ հաճելի է, որ պատմության մեջ առաջինն ենք հասել այս հաջողությանը: Շատ ուրախ և հպարտ եմ, որ այսպիսի ուժեղ թիմի ավագն եմ: Շնորհակալություն մեր երկրպագուներին, մեր հարազատներին իրենց աջակցության համար: Սա մեր բոլորի հաղթանակն է»,- ասել է Սանոսյանը:
Եվրոպայի առաջնության եզրափակիչ փուլը տեղի կունենա Լիտվայում և Լատվիայում 2026 թվականի հունվարի 18-ից փետրվարի 8-ը։
ՈՒԵՖԱ Ֆուտզալի ԵՎՐՈ 2026-ի որակավորման հիմնական փուլում Հայաստանի հավաքականն ընդգրկված էր 6-րդ խմբում, որտեղ մեր մրցակիցներն էին Ալբանիան, Դանիան և Ղազախստանը։ Հայաստանի ընտրանին Ռուբեն Նազարեթյանի գլխավորությամբ խմբում զբաղեցրել է առաջին հորիզոնականը` հավաքելով 16 միավոր:
Հայաստանի ֆուտզալի ազգային հավաքականը դարձել է Հայաստանի պատմության ընթացքում խաղային որևէ մարզաձև ներկայացնող առաջին հավաքականը, որ հասնում է նման հաջողության:
