Ծննդյանս օրը երազանք եմ պահել Լիանա Գյուրջյանի համար. բռնցքամարտիկ Անուշ Գրիգորյան
Ստրանջայի մրցաշարի բրոնզե մեդալակիր Անուշ Գրիգորյանն այսօր նշում է ծննդյան տարեդարձը. Ասում է՝ այս տարի երազանք է պահել ընկերոջ՝ ծանրամարտի կանանց հավաքականի անդամ Լիանա Գյուրջյանի համար:
«Շատ ավելի շատ սպասել եմ այս տարվա տարեդարձիս, որովհետև ընկերոջս՝ Լիանա Գյուրջյանի համար եմ երազանք պահել։ Մի քանի օրից ամեն ինչ պարզ կլինի, հուսով եմ, որ այդ երազանքս իրականություն կդառնա»,- ասել է Անուշ Գրիգորյանը լրագրողների հետ զրույցում։
Լիանա Գյուրջյանը, հիշեցնենք, ապրիլի 24-ին ելույթ է ունենալու Բաթումիում կայանալիք ծանրամարտի Եվրոպայի առաջնությանը: Գրիգորյանը նաև նշել է՝ իրենք շատ լուրջ են պատրաստվում Բրազիլիայում կայանալիք աշխարհի գավաթի խաղարկությանը:
«Շատ լուրջ ենք մոտենում այս մրցաշարին, որովհետև այն շատ կարևոր է մեզ համար: Եթե աշխարհի գավաթում շատ լուրջ հաջողություն գրանցենք, նշանակում է, որ մնացած մրցաշարերում կարող ենք լուրջ հաջողություններ ունենալ։ Մարզումները շատ լավ են անցել, իսկ թե ինչ կլինի, ցույց կտա ռինգը»:
