Ռեալ Սոսիեդադը հետխաղյա 11-մետրանոցներով հաղթեց Մադրիդի Ատլետիկոյին ու 4-րդ անգամ նվաճեց Իսպանիայի գավաթը

Իսպանիայի գավաթի խաղարկության եզրափակիչում «Ռեալ Սոսիեդադը» մրցում էր Մադրիդի «Ատլետիկոյի» հետ։ Հանդիպման հիմնական ու լրացուցիչ ժամանակներն ավարտվեցին 2։2 հաշվով։

Խաղի հաշիվը բացվեց Անդեր Բարենեչան՝ հանդիպման մեկնարկից 15 վայրկյան անց։ 18-րդ րոպեին Ադեմոլա Լուկմանը վերականգնեց հաշվի հավասարությունը, բայց «Ռեալ Սոսիեդադը» գնաց ընդմիջման հաղթողի կարգավիճակով։ Առաջին կեսին ավելացրած առաջին րոպեին Միկել Օյարզաբալը դիպուկ իրացրեց 11-մետրանոցը։ Խաղավարտից յոթ րոպե առաջ Խուլիան Ալվարեսը հաշիվը դարձրեց 2։2 և հանդիպումը տեղափոխվեց լրացուցիչ ժամանակ, որտեղ գոլեր չեղան։

Հետխաղյա 11-մետրանոց հարվածաշարում ուժեղ էին «Սոսիեդադի» ֆուտբոլիստները։ Դիպուկ էին Կարլոս Սոլերը, Լուկա Սուչիչը, Այեն Մունյոսը և Պաբլո Մարինը, իսկ Օրի Օուսկարսոնի հարվածը հետ մղեց Խուան Մուսոն։ Ի տարբերություն արգենտինացի դարպասապահի, Ունայ Մորենոն հետ մղեց «ատլետների» 5 հարվածներից 2-ը՝ ընդ որում առաջին երկու հարվածները՝ Ալեքսանդր Սյորլոթի և Խուլիան Ալվարեսի կատարմամբ։ Դիեգո Սիմեոնեի գլխավորած թիմում դիպուկ էին Նիկոլաս Գոնսալեսը, Թիագո Ալմադան և Ալեխանդրո Բաենան։

Մինչ եզրափակիչ հասնելը «Ռեալ Սոսիեդադը» պայքարից դուրս էր թողել «Նեգրեյրային» (3:0), «Ռոյս Ռեդդիսին» (2։0), «Էլդենսեին» (2։1), «Օսասունային» (2:2, հետխաղյա 11-մետրանոցներով՝ 4։3), «Ալավեսին» (3։2) և Բիլբաոյի «Ատլետիկին» (1։0, 1։0)։

Սա ակումբի պատմության 4-րդ հաղթանակն էր՝ գավաթի խաղարկությունում։ Նախկինում «Սոսիեդադը» գավաթին «տիրել էր» 1908/09, 1986/87 և 2019/20 մրցաշրջաններում։