Լուկակուն վերադառնում է Նապոլի. ակումբը կտուգանի բելգիացուն ինքնակամ բացակայության համար

Հարձակվող Ռոմելու Լուկակուն կվերադառնա «Նապոլիի» կազմ։

Նախորդ ամիս 32-ամյա հարձակվողը լքել էր Բելգիայի հավաքականի ճամբարը՝ որոշելով կենտրոնանալ ֆիզիկական մարզավիճակի բարելավման վրա։ Ֆուտբոլիստը մարզվում էր Բելգիայում՝ անհատական մարզչի հետ, սակայն այդ որոշումը համաձայնեցված չէր ակումբի հետ։

«Նապոլիի» դիրքորոշումն այս հարցում հստակ էր․  Լուկակուն պետք է վերադառնար թիմ մինչև մարտի 31-ը, հակառակ դեպքում նա կհեռացվեր կազմից։ Ռոմելուն նշանակված օրը չէր ներկայացել մարզմանը և ակումբում որոշել էին կիրառել կարգապահական միջոցներ։

Ըստ Corriere dello Sport-ի՝ ակնկալվում է, որ Լուկակուն երկուշաբթի կվերադառնա «Նապոլիի» մարզումներին։ Բելգիացին իր որոշման մասին ակումբին տեղեկացրել է գործակալի միջոցով։

Նշվում է, որ Լուկակուն և գլխավոր մարզիչ Անտոնիո Կոնտեն մարտի 20-ին կայացած «Կալյարիի» հետ խաղից (1:0) հետո չեն հանդիպել։ Նեապոլիտանական ակումբը որոշել է տուգանել 32-ամյա ֆուտբոլիստին՝ ինքնակամ բացակայության համար։

Բելգիայի հավաքականի խաղացողն այս մրցաշրջանում խաղադաշտում անցկացրել է ընդամենը 64 րոպե։