Գանձասարը չհաղթեց 10 հոգով մնացած ԲԿՄԱ-ին․ Ռոդրիգեսի գեղեցիկ գոլը չեղարկվեց (տեսանյութ)

Fastex Պրեմիեր լիգայի 22-րդ տուրում ԲԿՄԱ-ն ընդունել էր «Գանձասարին»։ Գրանցվեց ոչ-ոքի՝ 1։1 հաշիվը։

Հանդիպման հաշիվը 12-րդ րոպեին բացեց Նարեկ Հովհաննիսյանը՝ խփելով 7-րդ գոլն ընթացիկ մրցաշրջանում։ 16-րդ րոպեին Պողոս Կրմզյանն ուղիղ կարմիր քարտով հեռացվեց խաղադաշտից՝ սեփական տուգանային հրապարակում վերջին հույսի խախտում կատարելու համար։ Նշանակվեց 11-մետրանոց, սակայն Բերտրան Մանին չկարողացավ գրավել Դավիթ Դավթյանի պաշտպանած դարպասը։

Կարեն Բարսեղյանի գլխավորած թիմը հաշվի հավասարությունը վերականգնեց առաջին կեսի հիմնական ժամանակի ավարտից 1 րոպե առաջ։ Շուտո Կանդայի փոխանցումից աչքի ընկավ Լուկա Ռոդրիգեսը։

2-րդ կեսի ամենահետաքրքիր դրվագը գրանցվեց հիմնական ժամանակին ավելացրած 7-րդ րոպեին, երբ Ռոդրիգեսը շրջադարձ հարվածով գրավեց Դավթյանի դարպասը, սակայն հանդիպման գլխավոր մրցավար Յուրա Մահտեսյանը VAR համակարգի միջոցով կրկնապատկերը դիտելուց հետո արձանագրեց խախտում հարձակվող թիմի կողմից ու չեղարկեց «Գանձասարի» ֆուտբոլիստի գեղեցիկ գոլը։

Այս հանդիպումից հետո թիմերն ունեն 18-ական միավոր ու գտնվում են 7-րդ ու 8-րդ տեղերում։