Խաչատուր Խաչատրյանը զիջեց բրոնզե մեդալի համար գոտեմարտում

Տիրանայում ընթացող ազատ ոճի ըմբշամարտի Եվրոպայի առաջնության մրցումային վերջին օրը 125 կգ քաշային Խաչատուր Խաչատրյանը բրոնզե մեդալի համար պայքարում 2։6 հաշվով զիջեց թուրք Հաքան Բույուկչինգիլին։

Խաչատրյանը պայքարը սկսել էր որակավորման փուլից, որտեղ տուշեով հաղթանակի էր հասել լեհ Կամիլ Կոսցիոլեկի նկատմամբ։ Քառորդ եզրափակիչում հայ ըմբիշը հավասար գոտեմարտում զիջել էր Ադրբեջանը ներկայացնող Գեորգի Մեշվիլիդիշվիլլին։

Հիշեցնենք, որ ազատ ոճի Հայաստանի հավաքականի կազմում բրոնզե մեդալներ էին նվաճել 57 կգ քաշային Մանվել Խնձրցյանը, 61 կգ քաշային Արսեն Հարությունյանն ու 65 կգ քաշային Վազգեն Թևանյանը։ 79 կգ քաշային Հրայր Ալիխանյանը զիջել էր 3-րդ տեղի համար գոտեմարտում, իսկ 92 կգ քաշային Մուշեղ Մկրտչյանը պարտվել էր սփոփիչ գոտեմարտում։

70 կգ քաշային Դավիթ Մարգարյանը ու 74 կգ քաշային Նարեկ Հարությունյանը վաղաժամ լքել էին պայքարը։

Այսպիսով, ազատ ոճի Հայաստանի հավաքականը հայրենիք կվերադառնա 3 բրոնզե մեդալով։