Տիգրան Բարսեղյանը մոտ է տպավորիչ նվաճման

Սլովակիայի առաջնության չեմպիոնական փուլում «Սլովանի» հերթական հաղթանակը թիմին ևս մեկ քայլով մոտեցրել է չեմպիոնի կոչմանը: Այժմ Բրատիսլավան ներկայացնող թիմն ունի 62 միավոր և 7 միավորով առաջ է «Դունայսկա Ստրեդայից»: Առաջնության ավարտին մնացել է երեք տուր: Այդ երեք խաղերից նույնիսկ մեկում տարած հաղթանակը «Սլովանին» կդարձնի երկրի չեմպիոն:

Մոտալուտ տիտղոսը հինգերորդը կլինի Հայաստանի հավաքականի նախկին եզրային հարձակվող Տիգրան Բարսեղյանի համար: Նախորդ չորս առաջնություններում Տիգրան Սլովանի հետ դարձել է չեմպիոն: Մրցաշրջանի որոշիչ հատվածում 32-ամյա ֆուտբոլիստը հիանալի մարզավիճակ է հավաքել՝ նախորդ 8 խաղում խփել է 4 գոլ և կատարել 3 գոլային փոխանցում: Ապրիլի 26-ին Տիգրանը միակ գոլն էր խփել «Սպարտակ Տրնավայի» դեմ մրցավեճում:

Եթե Բարսեղյանը դառնա Սլովակիայի հնգակի չեմպիոն, ապա կհամարվի նաև երկրի պատմության ամենատիտղոսակիր ֆուտբոլիստներից մեկը: Այս պահին Սլովակիայի չեմպիոն ավելի շատ անգամ դարձել են ընդամենը հինգ խաղացողներ:

Հիշեցնենք, որ Տիգրանն ընդամենը 4,5 տարի է խաղում Սլովակիայում: