Ես պայքարում եմ ծանրաձողի, ոչ թե կոնկրետ մարզիկի հետ. Վարազդատ Լալայան
Ծանրամարտի Եվրոպայի եռակի չեմպիոն Վարազդատ Լալայանը լրագրողների հետ հանդիպմանն այսօր ամփոփել է Վրաստանում անցկացված Եվրոպայի առաջնությունը: Նրա խոսքով՝ հաղթանակի և արդյունքի տեսանկյունից առաջնությունը ստացված էր, բայց բարձրացրած կիլոգրամներն այնքան էլ բավարար չէին:
«Հիմա մի փոքր կհանգստանանք, հետո նորից կվերադառնանք մարզումներին և կսկսենք պատրաստվել աշխարհի առաջնությանը։ Աշխարհի առաջնությունում արդեն կփորձեմ բարելավել արդյունքներս և բարձրացնել ավելի շատ կիլոգրամներ, որովհետև այս կիլոգրամներով հնարավոր չէ պայքարել մեդալի կամ հաղթանակի համար: Դարձա եռակի Եվրոպայի չեմպիոն, ինչը շատ ուրախալի է թե՛ ինձ, թե՛ ֆեդերացիայի, և ընդհանրապես՝ ողջ հայ ազգի համար»,- ասել է Լալայանը։
Անդրադառնալով մրցակցությանը՝ Լալայանը նշել է. «Ես պայքարում եմ ծանրաձողի հետ, ոչ թե կոնկրետ մարզիկի։ Իմ հիմնական «հակառակորդը» ծանրաձողն է: Աշխարհի առաջնությունում, իհարկե, մրցակցությունն արդեն շատ ավելի մեծ է լինելու, և այնտեղ այս նույն խոսակցությունը չի լինի։ Այնտեղ արդեն կտեսնենք իրական պայքարը՝ թե՛ իմ, թե՛ մրցակիցների միջև»։
