Մեր մոտիվացիան ակումբի տարբերանշանն է, այլ ոչ թե Բարսելոնայի չեմպիոնությունը․ Ալվարո Արբելոա

Մադրիդի «Ռեալի» գլխավոր մարզիչ Ալվարո Արբելոան պատասխանել է Էլ Կլասիկոյի ժամանակ «Բարսելոնայի» համար «չեմպիոնական միջանցք» կազմելու մասին հարցին, եթե կատալոնացիները չեմպիոնությունը նվաճեն Լա Լիգայի 34-րդ տուրի արդյունքներով։

«Ո՛չ, դա իմ գլխավոր մոտիվացիան չէ։ Իմ գլխավոր մոտիվացիան երեք միավոր վաստակելն է, որովհետև դա այն է, ինչ պետք է թիմին, որովհետև դա է պահանջում ակումբի տարբերանշանը, և դա այն է, ինչ մեզ անհրաժեշտ է վերջին խաղերում գրանցած արդյունքներից հետո։

Ահա իմ գլխավոր մոտիվացիան։ Չկա ավելի մեծ մոտիվացիա, քան վաղը «Էսպանյոլի» նկատմամբ հաղթանակը»,–ասել է Արբելոան։

«Բարսելոնան» 11 միավորով առաջ է «արքայական» ակումբից։ Այսօր «կապտանռնագույնները» հյուրընկալվելիս կխաղան «Օսասունայի» հետ, իսկ «սերուցքայինները» վաղը կմրցեն «Էսպանյոլի» դեմ։ Եթե կատալոնացիները հաղթեն, իսկ մադրիդցիները միավորներ կորցնեն, ապա մայիսի 10-ին «Բարսելոնան» կընդունի «Ռեալին» արդեն չեմպիոնի կարգավիճակով։