Սիները ջախջախեց Զվերևին, հաղթեց Մադրիդի Մասթերսում ու գրանցեց յուրօրինակ ցուցանիշներ

Յանիկ Սիները դարձավ Մադրիդի «Մասթերսի» չեմպիոն՝ եզրափակիչում հաղթելով աշխարհի երրորդ ռակետ Ալեքսանդր Զվերևին`2։0 (6։1, 6։2) հաշվով։ Նա գերմանացուն հաղթել է վերջին ինը մրցավեճում, իսկ նրանց դիմակայության ընդհանուր հաշիվը 10:4 է։ Ընդհանուր առմամբ, Սիները տարավ իր 23-րդ անընդմեջ հաղթանակը։

Իտալացին շրջանցեց Նովակ Ջոկովիչին ու Ռաֆայել Նադալին և սահմանեց ռեկորդ՝ հաղթելով հինգերորդ անընդմեջ «Մասթերսում»։ Սիների հաղթական շարքը սկսվել էր անցյալ տարվա նոյեմբերին, երբ նա նվաճեց Փարիզի տիտղոսը։ Այս տարի նա արդեն հաղթել է Ինդիան Ուելսի, Մայամիի և Մոնտե-Կառլոյի մրցաշարերում։

Սիներն առաջին անգամ հաղթեց այս մրցաշարում։ Այժմ նա ունի 9 «Մասթերսներից» 8-ի տիտղոսները. նույնքան ունի միայն Ռոջեր Ֆեդերերը, իսկ բոլոր ինը «Մասթերսներում» հաղթել է միայն Նովակ Ջոկովիչը։

24-ամյա իտալացու համար սա կարիերայի 28-րդ տիտղոսն է և իններորդը՝ այս կարգի մրցաշարերում։ Այս մրցաշրջանում նա արդեն հաղթել է չորս տիտղոս։