Ծեծկռտուքներ, լարվածություն ու բարդ իրավիճակ Ռեալի հանդերձարանում․ Ֆուտբոլիստները չեն խոսում գլխավոր մարզչի հետ
Մադրիդի «Ռեալի» հանդերձարանում իրավիճակը ծայրահեղ լարված է։ Ինչպես հայտնում է Marca պարբերականը, գլխավոր մարզիչ Ալվարո Արբելոան լուրջ խնդիրներ ունի թիմի հետ։ Ըստ թերթի տվյալների՝ «Արքայական ակումբի» առնվազն 6 ֆուտբոլիստ նույնիսկ չի խոսում գլխավոր մարզչի հետ։
Տարաձայնություններ կան ոչ միայն մարզչի և խաղացողների, այլև հենց ֆուտբոլիստների միջև. նրանցից ոմանք նույնիսկ դադարեցրել են շփումն իրար հետ։
Լարվածությունը հասել է այն կետին, որ մարզումների ժամանակ գրանցվել են ֆիզիկական բախումներ։ Onda Cero-ի լրագրող Միգել Սերրանոն հայտնել էր, որ Անտոնիո Ռյուդիգերը հարվածել է Ալվարո Կարերասի դեմքին։ Այս տեղեկությունը հաստատել է նաև COPE-ի լրագրող Միգել Անխել Դիասը՝ նշելով, որ միջադեպը տեղի է ունեցել փետրվարին։ The Athletic-ն իր հերթին հավելել էր, որ գերմանացի պաշտպանը հետագայում ներողություն է խնդրել և թիմակիցներին ընտանիքներով հրավիրել ճաշի՝ հարաբերությունները հարթելու համար։
Ինքը՝ Կարերասը, սոցցանցերում մեկնաբանել է լուրերը.
«Ինչ վերաբերում է թիմակցիս հետ կապված միջադեպին, ապա դա եղել է եզակի և ոչ էական դեպք, որն արդեն հարթված է։ Ես շատ լավ հարաբերություններ ունեմ ամբողջ թիմի հետ»։
Սակայն սա միակ բախումը չէ։ Ըստ Marca-ի՝ հերթական մարզման ժամանակ քիչ է մնացել ծեծկռտուք սկսվի Օրելիեն Չուամենիի և Ֆեդերիկո Վալվերդեի միջև։ Խաղային դրվագներից մեկում կանոնների խախտումից հետո ֆուտբոլիստները սկսել են հրմշտել միմյանց, իսկ պարզաբանումները շարունակվել են հանդերձարանում։
Այս ամենը տեղի է ունենում «Բարսելոնայի» դեմ վճռորոշ հանդիպման նախաշեմին, որը կատալոնացիների համար կարող է չեմպիոնական դառնալ։
Արբելոան «Ռեալը» գլխավորել է հունվարին. նրա գլխավորությամբ թիմն անցկացրել է 24 հանդիպում, տարել 15 հաղթանակ և կրել 7 պարտություն։
