Ես հիանալի կարիերա եմ ունեցել և գոհ եմ այն ամենից, ինչին հասել եմ․ Մխիթարյան
Հայաստանի ազգային հավաքականի լավագույն ռմբարկու և Միլանի «Ինտերի» կիսապաշտպան Հենրիխ Մխիթարյանն անդրադարձել է իր ապագային և կարիերայի ներկայիս փուլին։ 37-ամյա ֆուտբոլիստի պայմանագիրը միլանյան ակումբի հետ ավարտվում է այս ամռանը։
«Այս պահին ոչ մի այլ բանի մասին չեմ մտածում։ Զգացմունքներս շատ են։ Ես հիանալի կարիերա եմ ունեցել և գոհ եմ այն ամենից, ինչին հասել եմ։ Ուրախ եմ, որ մինչ օրս խաղում եմ և հանդիսանում եմ «Ինտերի» մի մասնիկը՝ իմ թիմակիցների հետ, ովքեր վերջին չորս տարիների ընթացքում երկարացրին իմ կարիերան։
Չորեքշաբթի մեզ սպասվում է ևս մեկ հսկայական մարտահրավեր։ Հուսով եմ՝ կկարողանանք լավագույնս պատրաստվել և նվաճել ևս մեկ գավաթ»,- Մխիթարյանի խոսքերն է մեջբերում «Ինտերի» պաշտոնական կայքը։
Հիշեցնենք, որ «Ինտերն» արդեն իսկ ապահովել է Իտալիայի չեմպիոնի տիտղոսը։ Այս պահին թիմն ունի 85 միավոր։ Իսկ չորեքշաբթի՝ մայիսի 13-ին, միլանցիները Իտալիայի գավաթի եզրափակչում կմրցեն «Լացիոյի» հետ։
Ընթացիկ մրցաշրջանում Մխիթարյանը բոլոր մրցաշարերում մասնակցել է 36 հանդիպման՝ դառնալով 4 գոլի և 2 գոլային փոխանցման հեղինակ։
