Տիգրան Բարսեղյանի թիմի գլխավոր մարզիչը հեռացել է պաշտոնից՝ ստանալով նոր նշանակում
«Սլովանի» գլխավոր մարզիչ Վլադիմիր Վայսը նոր մրցաշրջանից կստանձնի Սլովակիայի ֆուտբոլի ազգային հավաքականի գլխավոր մարզչի պաշտոնը, տեղեկացնում է ակումբի մամուլի ծառայությունը։
Սլովակիայի ֆուտբոլի նորագույն պատմության ամենահաջողակ մարզիչը մրցաշրջանի վերջին՝ «Միխալովցեի» դեմ խաղից հետո կհեռանա ակումբից և կտեղափոխվի ազգային թիմի մարզչական շտաբի ղեկավարի պաշտոնին:
«Առաջին հերթին ակումբի անունից կցանկանայի մեծ շնորհակալություն հայտնել Վլադիմիր Վայսին այն ամենի համար, ինչ նա արել է «Սլովանի» համար: Նրա գլխավորությամբ մենք հասանք պատմական նվաճման՝ դուրս գալով Չեմպիոնների լիգա և երկարաձգեցինք մեր ռեկորդային չեմպիոնական շարքը՝ հասցնելով այն ութի: Ես հարգում եմ մարզիչ Վայսին ոչ միայն որպես սլովակյան ֆուտբոլի մեծագույն անհատականության, այլև որպես մարդու»,- նշել է ակումբի գլխավոր տնօրեն Իվան Կմոտրիկը:
Հիշեցնենք, որ Հայաստանի ազգային հավաքականի նախկին ֆուտբոլիստ Տիգրան Բարսեղյանը հենց Վայսի գլխավորությամբ էր համալրել Սլովակիայի չեմպիոնի շարքերը՝ նրա գլխավորությամբ անցկացրած 189 խաղում դառնալով 61 գոլի ու 40 գոլային փոխանցման հեղինակ։
