Ֆին Գերագուսյանն առաջին պրոֆեսիոնալ պայմանագիրն է կնքել Սանդերլենդի հետ
Հայաստանի հավաքականի ֆուտբոլիստ Ֆին Գերագուսյանը «Սանդերլենդի» հետ ստորագրել է իր առաջին պրոֆեսիոնալ պայմանագիրը։ Այս մասին հայտնում է անգլիական ակումբի պաշտոնական կայքը:
Հարձակվողը նախորդ մրցաշրջանում ակադեմիայի թիմերի կազմում խփել է 13 գոլ և կատարել 3 գոլային փոխանցում՝ շարունակելով իր արդյունավետ ելույթները 2024/25 մրցաշրջանից հետո, որի ընթացքում ընդհանուր առմամբ մասնակցել էր 19 գոլային գործողության։
«18-ամյա ֆուտբոլիստի համար հաջողությունները շարունակվել են նաև միջազգային ասպարեզում․ նախորդ մրցաշրջանում նա առաջին անգամ հրավիրվել է Հայաստանի ազգային հավաքական և մարտին Բելառուսի դեմ խաղում նշել իր նորամուտը»,- ասվում է ակումբի տարածած հաղորդագրության մեջ։
Իր առաջին պրոֆեսիոնալ պայմանագիրը ստորագրելուց հետո Գերագուսյանն ասել է. «Անչափ հպարտ եմ ինձնով։ Մարզիչներն ու ակումբի ամբողջ անձնակազմն ինձ շատ են օգնել, և առանձնահատուկ շնորհակալություն եմ ուզում հայտնել նաև ընտանիքիս, որն այս մրցաշրջանի ընթացքում մշտապես աջակցել ու առաջ է մղել ինձ։ Ես արդեն ունեցել եմ հիանալի հնարավորություններ և արժեքավոր փորձ, և հուսով եմ, որ այս մրցաշրջանում դրանք ավելի շատ կլինեն»։
Ակադեմիայի ղեկավար Ջոն Հյուիթսոնը հավելել է. «Ֆինը վերջին երկու մրցաշրջանների ընթացքում հսկայական առաջընթաց է գրանցել, ինչը նրա աշխատասիրության և նվիրվածության լավագույն ապացույցն է։ Մենք շատ ուրախ ենք, որ նա շարունակելու է իր զարգացումն ու առաջընթացը մեր ակումբում»։
