Այսպիսի խաղերը շատ կարևոր են մեր բնավորությունը ցույց տալու համար. Գոռ Մանվելյան

«Նոայի» կիսապաշտպան Գոռ Մանվելյանը «Շիրակի» դեմ Գյումրիում կայացած խաղից հետո կիսվել է տպավորություններով, փոխանցում է ակումբի մամուլի քարտուղարությունը:

«11-մետրանոցը շատ վստահ եմ իրացրել ու շատ ուրախ եմ գոլի համար։ Գնում ենք դեպի չեմպիոնություն և այսպիսի խաղերը կարևոր են մեզ համար, որպեսզի ցույց տանք թիմի բնավորությունը», - ասել է Մանվելյանը:

Հիշեցնենք՝ Fastex Հայաստանի Պրեմիեր լիգայի 24-րդ տուրում «Նոան» Գյումրիի «Քաղաքային» մարզադաշտում 2:1 հաշվով հաղթել է «Շիրակին» գերլարված խաղում։ Գյումրեցիների դարպասին հանդիպման ընթացքում երեք 11-մետրանոց է նշանակվել, որից երկուսը դարպասապահը հետ է մղել:

Հիմնական ժամանակի ավարտից 4 րոպե առաջ մրցավարը ևս մեկ 11 մետրանոց է նշանակել «Շիրակի» դարպասին, որից հետո կրքերը խաղադաշտում թեժացել են։ Գյումրեցի երկրպագուները սկսել են իրեր նետել խաղադաշտ, հանդիպումը մի քանի րոպե անց շարունակվել է։

Այսպիսով, «Նոան» մրցաշարային աղյուսակը գլխավորում է 52 միավորով ու 5 միավորի առավելություն ունի երկրորդ տեղում գտնվող, մեկ խաղ ավելի անցկացրած «Ուրարտուի» նկատմամբ։

«Շիրակը» 25 միավորով 6-րդն է։