Ռուս մարզիչը գնահատել է Սպերցյանի՝ Ինտեր տեղափոխության հնարավորությունը
«Լոկոմոտիվի» նախկին մարզիչ Անատոլի Բիշովեցը VseProSport-ին տված հարցազրույցում խոսել է «Կրասնոդարի» և Հայաստանի հավաքականի կիսապաշտպան Էդուարդ Սպերցյանի՝ Միլանի «Ինտեր» հնարավոր տեղափոխության մասին:
«Արդյո՞ք հնարավոր է Սպերցյանի տեղափոխությունը «Ինտեր»՝ հաշվի առնելով Մխիթարյանի ազդեցությունը։ Ինձ համար դժվար է ասել։ Կարծում եմ, որ կուսումնասիրեն, կդիտեն։ Ընդհանուր առմամբ, նա թողնում է դրական տպավորություն, բայց արտասահմանում խաղալու համար անհրաժեշտ է լինել պատրաստ անձնական որակներով՝ այսինքն, թե ինչպես կկարողանաս դրսևորել քեզ «Ինտերի» ֆուտբոլիստների ֆոնին, հետո թիմը և գլխավոր մարզիչը պետք է ընդունեն քեզ։ Միջավայր, լեզու և այլն։ Նույնիսկ եթե նա միայնակ չլինի և խոսի հայերեն, դա դեռ քիչ է»,- ասել է Բիշովեցը։
Սպերցյանը «Կրասնոդարի» սան է և «Ցլերի» հիմնական թիմում հանդես է գալիս 2021 թվականի հուլիսից։ Ընդհանուր առմամբ նա ակումբի կազմում անցկացրել է 135 հանդիպում, դարձել 40 գոլի և 29 գոլային փոխանցման հեղինակ։ Ֆուտբոլիստի պայմանագիրը «Կրասնոդարի» հետ ավարտվում է 2026 թվականի հունիսին։ Էդուարդ Սպերցյանի տրանսֆերային արժեքը Transfermarkt պորտալը գնահատում է 20 մլն եվրո։
Այս պահին «Կրասնոդարը» զբաղեցնում է ՌՊԼ-ի մրցաշարային աղյուսակի առաջին հորիզոնականը, թիմն ունի 49 միավոր։
Ավելի վաղ լրատվամիջոցները հայտնել էին, որ միլանյան թիմի ղեկավարությունը Հենրիխ Մխիթարյանի խորհրդով հետևում է «Կրասնոդարի» 24-ամյա կիսապաշտպան Սպերցյանի ելույթներին և մտադիր է առաջարկ անել նրա տրանսֆերի վերաբերյալ 2025 թվականի ամռանը։ Նշենք, որ մինչ այդ հայ կիսապաշտպանին ձեռք բերելու հնարավորություն վերագրվում էր Իտալիայի առաջնության երկու այլ ակումբների՝ «Յուվենտուսին» և «Ատալանտային», սակայն երկու դեպքում էլ թիմերի ներկայացուցիչները հերքել էին այդ լուրերը։
