Արարատ-Արմենիան խոշոր հաշվով հաղթեց Ուրարտուին․ Նուբիսին՝ հեթ-տրիկի հեղինակ

Fastex Հայաստանի Պրեմիեր լիգայի 25-րդ տուրում «Արարատ-Արմենիան» հյուրընկալվել էր «Ուրարտուին»։

Վարդան Մինասյանի սաները 3 անպատասխան գնդակ ուղարկեցին մրցակցի դարպասը։ Խաղի հաշիվը 34-րդ րոպեին, 11-մետրանոցից, բացեց Մարիուս Նուբիսին, որը 4 րոպե անց մեն-մենակ մնաց Ալեքսանդր Մելիխովի դեմ՝ գրավելով վերջինիս պաշտպանած դարպասը։ 75-րդ րոպեին Նուբիսին հեթ-տրիկ ձևակերպեց՝ դնելով հանդիպման վերջակետը։

Հանդիպման ընթացքում խաղադաշտ վերադարձավ նաև Հովհաննես Հարությունյանը, որը վերականգնվել է վնասվածքից։

Այս հաղթանակից հետո «Արարատ-Արմենիան» 48 միավորով բարձրանում է 2-րդ հորիզոնական, «Ուրարտուն» ունի մեկ միավոր ավելի քիչ ու եզրափակում է լավագույն եռյակը։