ԿԼ. Արարատ-Արմենիան կխաղա Միրանյանի նախկին թիմի դեմ, Փյունիկն ու Ուրարտուն իմացել են իրենց հնարավոր մրցակիցներին
Հայտնի է դարձել Կոնֆերենցիաների լիգայում որակավորման առաջին փուլը հաղթահարելու դեպքում «Ուրարտուի» և «Փյունիկի» հնարավոր մրցակիցները։ Իր մրցակցին իմացել է նաև Հայաստանի փոխչեմպիոն «Արարատ-Արմենիան», որը պայքարը սկսելու է ԿԼ որակավորման երկրորդ փուլից: Վիճակահանությունը կայացել է շվեյցարական Նիոն քաղաքում տեղակայված ՈՒԵՖԱ-ի շտաբ-բնակարանում:
Հայաստանի առաջնության բրոնզե մեդալակիր «Ուրարտուն» Կոնֆերենցիաների լիգայի որակավորման առաջին փուլում կմրցի բելառուսական «Նեման Գրոդնոյի» հետ: Առաջին փուլի արգելքը հաղթահարելու դեպքում, երկրորդ փուլում երևանյան թիմը կմրցի Սլովակիան ներկայացնող «ԴԱԿ Դունայսկա Ստրեդայի» ակումբի հետ: Այս դիմակայության առաջին հանդիպումը տեղի կունենա հուլիսի 24-ին և «Ուրարտուի» համար կլինի արտագնա, իսկ պատասխան հանդիպումը՝ հուլիսի 31-ին Երևանում։
Որակավորման առաջին փուլում «Փյունիկի» մրցակիցը, հիշեցնենք, Սան Մարինոն ներկայացնող «Տրե Ֆիորին» է։ Երկրորդ փուլ դուրս գալու դեպքում Եղիշե Մելիքյանի թիմը կխաղա հունգարական «Էտո Դյոր» թիմի հետ:
Հայաստանի փոխչեմպիոն «Արարատ-Արմենիան» ԿԼ որակավորման երկրորդ փուլում կմրցի ռումինական «Ունիվերսիտատեա Կլուժ» թիմի հետ: Երևանյան թիմն առաջին խաղը կանցկացնի տանը, պատասխան հանդիպումը՝ Ռումինիայում: Ըստ նախնական օրացույցի՝ որակավորման երկրորդ փուլի հանդիպումները նախանշված են հուլիսի 24-ին և 31-ին:
Վիճակահանության արդյունքում պարզ է դարձել նաև, որ «Նոան» ՉԼ որակավորման առաջին փուլում պարտվելու դեպքում Կոնֆերենցիաների լիգայի որակավորման երկրորդ փուլում կխաղա ԿուՊՍ (Ֆինլանդիա)-«Միլսամի» (Մոլդովա) զույգի պարտվողի հետ:
ԿԼ որակավորման 2025/26 խաղարկության առաջին փուլի հանդիպումները նախատեսված են հուլիսի 10-ին, իսկ պատասխան խաղերը՝ հուլիսի 17-ին:
