Լոնդոնում ՀՀ թենիսի ֆեդերացիայի նախագահը հանդիպել է թենիսի միջազգային ֆեդերացիայի նախագահ, միջազգային օլիմպիական կոմիտեի անդամ Դեյվիդ Հագերտի հետ։
Ճանաչողական և գործնական խոսակցության ընթացքում միջազգային ֆեդերացիայի նախագահին ներկայացվել է Հայաստանում թենիսի վիճակը և զարգացման հեռանկարները։ Վարդան Զաքարյանը մանրամասն ներկայացրել է Ծաղկաձորի գլխավոր մարզահամալիրում կառուցված թենիսի 9 բաց և 4 փակ կորտերի, դրանց հիման վրա թենիսի ակադեմիա ստեղծելու գաղափարը։ Միջազգային ֆեդերացիայի նախագահը խոստացել է ֆինանսական աջակցություն ցուցաբերել Հայաստանի թենիսի ֆեդերացիային՝ նմանօրինակ լավ նախաձեռնությունների համար և ընդունել է ՀԹՖ նախագահի հրավերն ու 2026 թվականին կայցելի Հայաստան։
Դեյվիդ Հայգերտիի հետ քննարկվել են նաև 2027 թվականի ITF-ի տարեկան ընդհանուր ժողովը Երևանում անցկացնելու, ինչպես նաև 2026 թվականի Դևիսի գավաթի Եվրոպայի 4-րդ գոտու մրցաշարը Հայաստանում կազմակերպելու հարցերը։
Քննարկվել են նաև ITF-ի մասնագետների, մարզիչների, մրցավարների, փորձագետների Հայաստան այցերի կազմակերպման և այլ հարցեր։
Անգլիա կատարած այցի ընթացքում Վարդան Զաքարյանը հանդիպել է նաև Եվրոպայի թենիսի ֆեդերացիայի նախագահ Հենրիկ Պեդերսենի հետ։ Եվրոպայի ֆեդերացիայի նախագահը քաջատեղյակ էր Հայաստանում թենիսի բնագավառում եղած լրջագույն փոփոխություններին և գալիք ծրագրերին։
Պարոն Պեդերսենը տեղեկացրել է, որ քննարկվում է 2027-2028 թվականներին թենիսի Եվրոպայի տարեկան ընդհանուր ժողովի անցկացնումը Երևանում․
«Դա մեծագույն պատիվ է ինչպես մեր ֆեդերացիայի, այնպես էլ համոզված եմ իմ երկրի համար»-ընդգծել է Վարդան Զաքարյանը՝ ավելացնելով, որ և՛ ինքը, և՛ ֆեդերացիան ամեն ինչ կանեն այդ կարևորագույն միջոցառումը լավագույնը կազմակերպելու համար։
Այցի վերջում Վարդան Զաքարյանը հանդիպել է Անգլիայի թենիսի ֆեդերացիայի նախագահ Սենդի Փրոքտերի հետ։ Անմիջական մթնոլորտում կայացած հանդիպման ընթացքում նախագահները քննարկել են երկու երկրներում թենիսի զարգացման հնարավոր բոլոր ուղիների, ծրագրերի և աջակցությունների հարցերը։ Վարդան Զաքարյանը խորին շնորհակալություն է հայտնել տիկին Փրոքտերին՝ նրան հրավիրելով Հայաստան։ Հայաստանի ֆեդերացիայի նախագահը շուրջ մեկ տասնյակ այլ հանդիպումներ է ունեցել առանձին երկրների ներկայացուցիչների, թենիսի անվանի մասնագետների և հանրահայտ մարզիկների հետ։
