Պարտության համար ես ինքս ամաչել եմ․ Ունենք շանս ու պարտավոր ենք անցնել այս թիմին․ Եղիշե Մելիքյան (տեսանյութ)

Կոնֆերենցիաների լիգայի որակավորման 1-ին փուլի «Փյունիկ»-«Տրե Ֆիորի» դիմակայության պատասխան խաղից առաջ տեղի է ունեցել երևանյան ակումբի ֆուտբոլիստ Դանիել Աղբալյանի ու գլխավոր մարզիչ Եղիշե Մելիքյանի մամուլի ասուլիսը։

Աղբալյանը խոսել է «Փյունիկ» տեղփոխության, թիմում մրցակցության ու «Տրե Ֆիորիից» կրած պարտության մասին, իսկ Մելիքյանը խոսել է նախորդ խաղում պարտության, թիմում մթնոլորտի ու անհամաձայնությունների մասին․

«Պատրաստ էինք, թե պատրաստ չէինք՝ իրավունք չունեինք պարտվելու և իրավունք էլ չունենք պատճառաբանելու, թե ինչու այդպես ստացվեց։ Պարտավոր էինք հաղթել։ Ես ինքս ամաչել եմ, պետք է հաղթեինք, բայց փառք Աստծո ունենք շանս ուղղելու։ Մեր առաջադրանքն այս թիմին անցնելն է, մենք պարտավոր ենք ու ամեն ինչ կանենք, որ դուրս գանք հաջորդ փուլ»։

Մելիքյանը նշել է, որ թիմում առողջ մթնոլորտ է, սակայն իր համար էլ է անհասկանալի, որ իր հայտարարությունից հետո ակումբի նախագահն այլ հայտարարությամբ է գալիս․ «Չգիտեմ, դա ինչու է արվում, բայց հարգանքն ու վերաբերմունքը կա։ Ես լիովին նվիրված աշխատում եմ իմ թիմի հետ ու ամեն ինչ պոզիտիվ է։ Բոլորիս վրա ազդել է այս պարտությունը, բայց դա տվեց թիմին փորձ, իսկ ինձ, որպես գլխավոր մարզիչ, տվեց ոչ թե փորձ, այլ առիթ էր ավելի ճիշտ հասկանալու համար, թե ինչպես են աշխատում մեր հետ ու ինչպես պետք է նայել ամեն ինչին», - նշել է մասնագետը։

Մանրամասն տեսանյութում․



Հիշեցնենք, որ Սան Մարինոյում կայացած խաղում «Փյունիկը» զիջել էր նվազագույն հաշվով։ Պատասխան խաղը կկայանա հուլիսի 16-ին՝ Վազգեն Սարգսյանի անվան «Հանրապետական» մարզադաշտում ու կմեկնարկի 20։00-ին։ Մուտքն ազատ է։