Սկաուտինգի և հավաքագրման ոլորտում փորձ ունեցող Վիկտոր Լաֆուենտեն միացել է Փյունիկին

Սկաուտական ոլորտում մեծ փորձ ունեցող իսպանացի Վիկտոր Լաֆուենտեն միացել է «Փյունիկին»: Այս մասին հայտնում է երևանյան ակումբի պաշտոնական կայքը։

«Հերկուլես» ՖԱ-ի նախկին պրոֆեսիոնալ ֆուտբոլիստ Վիկտոր Լաֆուենտեն տեղափոխվելով ֆուտբոլային մենեջմենթի ոլորտ՝ նշանակալից ազդեցություն ունեցավ իսպանական ֆուտբոլի վրա:
2018 թվականից մինչև 2022 թվականը Լաֆուենտեն «Մուրսիայում» զբաղեցրել է տեխնիկական տնօրենի պաշտոնը: 

2022-2024թթ. Վիկտոր Լաֆուենտեն տեխնիկական տնօրեն է եղել իսպանական «Էլդենսե» ակումբում: Թիմը Լաֆուենտեի օրոք հասել է մինչև Իսպանիայում հզորությամբ երկրորդ առաջնություն՝ Լա Լիգա 2:

Սկաուտինգի և հավաքագրման ոլորտում իր մեծ փորձառության շնորհիվ՝  Վիկտորը առանցքային դեր կունենա թոփ տաղանդների  բացահայտման, տրանսֆերային բանակցությունների և նոր գործընթացների մշակման գործում՝ «Փյունիկ» ՖԱ-ի կազմի համալրման ռազմավարության շրջանակում: 

Իսպանական ֆուտբոլի վերաբերյալ նրա խորը գիտելիքները կուժեղացնեն ակումբի կազմը և կընդլայնեն «Փյունիկի» ներկայությունը միջազգային ասպարեզում:

Մենք անհամբեր սպասում ենք Վիկտորի գործունեությանը և վստահ ենք, որ նրա մասնագիտական փորձը առանցքային դեր կխաղա
«Փյունիկ» ՖԱ-ի ապագան կերտելու հարցում:

Բարի գալուստ Երևան, Վիկտոր»,-ասված է երևանյան ակումբի հայտարարությունում:

Ֆաստեքս Հայաստանի Պրեմիեր լիգայի գարնանային հատվածից առաջ «Փյունիկը» 37 միավորով 3-րդն է ու 3 միավոր է զիջում մեկ խաղ պակաս անցկացրած, առաջատար «Նոային»։

Փետրվարի 20-ին Եղիշե Մելիքյանի գլխավորած թիմը Հայաստանի սուպերգավաթի համար խաղում կմրցի «Արարատ-Արմենիայի» հետ, իսկ փետրվարի 25-ին կանցկացնի տարվա առաջին խաղը առաջնությունում՝ հյուրընկալվելով «Ալաշկերտին»։