Լոկոմոտիվի հետ մեկ չեմպիոնությունն ավելի արժեքավոր է, քան Զենիթի հետ 5-ը. Նաիր Թիկնիզյան
Հայաստանի ազգային հավաքականի և «Լոկոմոտիվի» պաշտպան Նաիր Թիկնիզյանը խոստովանել է, որ իր համար մոսկովյան թիմի հետ մեկ չեմպիոնական տիտղոս նվաճելն ավելի կարևոր է, քան «Զենիթի» հետ հինգը։
«Կարծում եմ՝ ռուսական անձնագրով խաղացողի համար «Զենիթը» պատմություն է ոչ թե ֆուտբոլի, այլ փողի մասին: Որոշեցի, որ եթե ամբողջությամբ նվիրվեմ ֆուտբոլին, ինչպես անում եմ, ապա ֆինանսական տեսանկյունից ինձ լավ կզգամ «Լոկոմոտիվում»։ «Լոկոմոտիվի» հետ մեկ չեմպիոնական տիտղոսն ինձ համար ավելի արժեքավոր է, քան հինգը՝ «Զենիթի» հետ»,-Թիկնիզյանի խոսքերն է մեջբերում «Спорт-экспресс»-ը։
Այս մրցաշրջանում 25-ամյա Թիկնիզյանը բոլոր մրցաշարերում մասնակցել է 23 հանդիպման՝ դառնալով 2 գոլի և երեք գոլային փոխանցման հեղինակ։ Նաիրի ներկայիս աշխատանքային պայմանագիրը «Լոկոմոտիվի» հետ նախատեսված է մինչև 2026 թվականի ամառը: Նախորդ տարի հաղորդվում էր, որ «Զենիթը» հետաքրքրված է հայ ֆուտբոլիստի ծառայություններով, սակայն տրանսֆերը այդպես էլ չկայացավ:
