Ամոյանը հաղթեց Պանամերիկյան խաղերի չեմպիոնին ու դուրս եկավ 1/8 եզրափակիչ

Զագրեբում ընթացող ըմբշամարտի աշխարհի առաջնությունում պայքարը սկսել են հունահռոմեական ոճի ըմբիշները։

77 կգ քաշային կարգում Հայաստանը ներկայացնող Մալխաս Ամոյանը մրցում էր Պանամերիկյան խաղերի հաղթող, ԱՄՆ-ն ներկայացնող Քամալ Բեյի հետ ու առավելության հասավ 2։1 հաշվով։

Ի դեպ, Քամալ Բեյը, Պանամերիկյան խաղերի եզրափակչում առավելության էր հասել Արգենտինան ներկայացնող Արսեն Ջուլֆալակյանի նկատմամբ։

Այսպիսով, Ամոյանը դուրս է գալիս 1/8 եզրափակիչ, որտեղ կմրցի Լեհաստանը ներկայացնող Մատեուշ Բերնատեկի հետ, որը 6։1 հաշվով առավելության հասավ UWW դրոշի ներքո հանդես եկող, Ռուսաստանը ներկայացնող Արման Կարապետյանի նկատմամբ։

Հիշեցնենք, որ այսօր պայքարի մեջ կմտնի նաև 55 կգ քաշային Մանվել Խաչատրյանը։ Ավելի վաղ պայքարը սկսած 130 կգ քաշային Ռազմիկ Քուրդյանը հաղթելով Ադրբեջանը ներկայացնող մրցակցին դուրս է եկել 1/8 եզրափակիչ, իսկ 82 կգ քաշային Սամվել Գրիգորյանը զիջել է մեկնարկում։

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։