Ցավոք, իմ վերջին խաղում տրվելով էմոցիաներին, սխալվեցի․ Տիգրան Բարսեղյանը հանդես է եկել հայտարարությամբ

Հայաստանի ազգային հավաքականի հարձակվող Տիգրան Բարսեղյանը Իռլանդիա-Հայաստան (1։0) հանդիպման ընթացքում տեղի ունեցած միջադեպից հետո առաջին անգամ հանդես է եկել հայտարարությամբ․

«Կյանքում ու հատկապես ֆուտբոլում լինում են պահեր, երբ դժվար է մի վայրկյանում որոշում կայացնել։ Ցավոք, իմ վերջին խաղում տրվելով էմոցիաներին, սխալվեցի։ Շատ եմ ափսոսում, որ առաջիկա կարևոր խաղերում չեմ կարողանալու լինել դաշտում ու օգնել թիմակիցներիս։ Մեր ազգային թիմը միշտ պայքարում է մինչև վերջ ու վստահ եմ՝ տղաները ամեն ինչ կանեն ամբողջ սրտով ու ամբողջ ուժով։

Շնորհակալ եմ մեր գլխավոր մարզչին, թիմակիցներիս ու մեր հավաքականի երկրպագուներին՝ աջակցության, վստահության ու այն ջերմության համար, որ զգում եմ անգամ այս դժվար պահին։ Դա շատ մեծ ուժ է տալիս ինձ։ Այսօր առանձնապես գնահատում եմ մեր թիմի միասնությունը։ Մեր թիմում ձևավորվել է առողջ և միավորված միջավայր, որտեղ նման դժվարություններն անցելն ավելի հեշտ է։ Ես միշտ ձեր կողքին եմ՝ նույնիսկ դաշտից դուրս»,-հայտարարել է Բարսեղյանը։

Հիշեցնենք, որ Իռլանդիա-Հայաստան հանդիպման 52-րդ րոպեին Բարսեղյանը գլխով հարվածել էր մրցակցի ֆուտբոլիստ Ֆին Ազազին ու ուղիղ կարմիր քարտով հեռացվել էր խաղադաշտից։

Հայաստանի հավաքականը նոյեմբերին կանցկացնի 2 պաշտոնական հանդիպում՝ աշխարհի առաջնության ընտրական փուլի 5-րդ տուրում ընդունելով Հունգարիայի ընտրանուն, իսկ 6-րդ տուրում՝ հյուրընկալվելով Պորտուգալիայի հավաքականին։ Տիգրան Բարսեղյանը տեղի ունեցած միջադեպի համար որակազրկվել է ու չի օգնի հավաքականին առաջիկա 3 պաշտոնական խաղերի ընթացքում։