Գարիկ Կարապետյանը՝ Եվրոպայի Մ23 չեմպիոն․ Պետրոս Պետրոսյանը պոկում ձախողելուց հետո 1-ինն է հրումում (տեսանյութ)

Ալբանիայի Դուրրես քաղաքում ընթացող Եվրոպայի երիտասարդների և մինչև 23 տարեկանների առաջնություններում պայքարն ավարտեցին Մ23 խմբում հանդես եկող 110 կգ քաշային տղաները:

Այս քաշային կարգում Հայաստանը ներկայացնում էին Գարիկ Կարապետյանն ու Պետրոս Պետրոսյանը։

Պետրոսյանը պոկումում ձախողեց բոլոր մոտեցումները՝ չկարողանալով գլխավերևում պահել 168 կգ կշռող ծանրաձողը։ Հրում վարժությունում հայ մարզիկն արժանացավ փոքր ոսկե մեդալի՝ բարձրացնելով 221 կգը։

Գարիկ Կարապետյանը պոկումում անգերազանցելի էր 182 կգ արդյունքով։ Հրում վարժությունում Կարապետյանը նվաճեց փոքր արծաթե մեդալ 215 կգ արդյունքով։ Երկամարտի 397 կգով Կարապետյանը դարձավ Եվրոպայի Մ23 հաղթող։ Տեսանյութը՝ այստեղ։

Հիշեցնենք, որ ավելի վաղ Եվրոպայի երիտասարդների չեմպիոն էին հռչակվել Ալեքսանդրա Գրիգորյանը, Տիգրան Կարապետյան և Էմմա Պողոսյանը: Արծաթե մեդալ էին նվաճել Նարեկ Գրիգորյանը, Նարեկ Մկրտչյանը, բրոնզե մեդալ՝ Մերի Միսակյանը և Աննա Ամրոյանը։

Մ23 խմբում հաղթող էր ճանաչվել Գառնիկ Չոլակյանը, արծաթե մեդալակիր էր դարձել Մնացական Աբրահամյանը, բրոնզե մեդալ էր նվաճել Գոռ Սահակյանը։