«Նոայի» կազմը վարձակալական հիմունքներով համալրել է պորտուգալացի աջ եզրային վինգեր Բրունո Ալմեյդան։
28-ամյա վինգերը հանդես է եկել պորտուգալական ակումբներում։ 2023/24 մրցաշրջանում «Սանտա Կլարայի» կազմում հռչակվել է Պորտուգալիայի 2-րդ լիգայի չեմպիոն՝ 32 խաղում դառնալով 15 գոլի և 4 գոլային փոխանցման հեղինակ։
Բրունո Ալմեյդան Պորտուգալիայի բարձրագույն լիգայում անցկացրել է 29 հանդիպում դառնալով 1 գոլի և 3 գոլային փոխանցման հեղինակ։
«Տեսնելով «Նոայի» և մարզչի հաջողությունները՝ դարձա այս ճանապարհի մի մասը։ Այս մարզաշապիկը կրելը պատիվ է ինձ համար, և ես պատրաստ եմ անել առավելագույնը՝ աջակցելու թիմակիցներիս և օգնելու մեր հավակնոտ ակումբին հասնել ամենաբարձր նվաճումներին՝ երկրպագուների և հայկական ֆուտբոլի համար»,-ասել է Ալմեյդան երևանյան ակումբի մամուլի ծառայության հետ զրույցում։
Ֆաստեքս Հայաստանի Պրեմիեր լիգայի գարնանային հատվածից առաջ «Նոան» 16 խաղից հետո 40 միավորով առաջատար է ու 2 միավորի առավելություն ունի 18 խաղ անցկացրած «Ուրարտուի» նկատմամբ։
Փետրվարի 19-ին «Նոան» կմրցի «Ալաշկերտի» հետ Հայաստանի գավաթի խաղարկության 1/8 եզրափակիչում։
Ֆաստեքս Հայաստանի Պրեմիեր լիգայում Մոտայի գլխավորած թիմը փետրվարի 26-ին կհյուրընկալվի «Վեստ Արմենիային»։
