Առողջությունս լավագույն վիճակում չէ․ Երկրպագուները կարող են հանգիստ լինել, Կրասնոդարը կշարունակի գոյություն ունենալ․ Գալիցկի

«Կրասնոդարի» սեփականատեր Սերգեյ Գալիցկին խոսել է իր առողջական վիճակի մասին։

Գալիցկին նշել է, որ անցած մրցաշրջանի 26-րդ տուրում Մախաչկալայում կայացած հանդիպումը, որտեղ «Կրասնոդարը» 3:2 հաշվով հաղթել էր տեղի «Դինամո», չի դիտել։ Նրա խոսքով՝ առողջական խնդիրները երբեմն թույլ չեն տվել նույնիսկ ուղիղ եթերում հետևել որոշ խաղերի։

«Չի կարելի համեմատել, թե ինչպես եմ հիմա մասնակցում ակումբի կյանքին և ինչպես էի մասնակցում հինգ տարի առաջ։ Մինչ իմ հիվանդությունը, մինչ այն բարդ իրավիճակները, որոնք եղել են իմ կյանքում, դա ես անում էի գիտակցված», – ասել է նա։

Գալիցկին ընդգծել է, որ ակումբն այլևս կախված չէ մեկ անձից։ Նրա խոսքով՝ եկամուտները և ակադեմիայում ու ակումբում ներդրված ռեսուրսները թույլ կտան «Կրասնոդարին» առաջիկա 10-15 տարիներին ֆինանսապես կայուն մնալ՝ անկախ նրանից, նա կլինի ակումբում, թե ոչ։

«Այն, ինչ խոստացել էի, կատարել եմ։ Մեր երկրպագուները կարող են հանգիստ լինել», – նշել է Գալիցկին «Краснодар. Путь к чемпионству» ֆիլմում։