Ինձ համար փառքն ամենավատ բաներից մեկն է․ Էնդրիկ
Մադրիդի «Ռեալի» հարձակվող Էնդրիկը, որը մինչ ընթացիկ մրցաշրջանի ավարտը վարձակալությամբ հանդես է գալու ֆրանսիական «Լիոնում», խոսել է վաղ տարիքում մեծ ճանաչում ձեռք բերելու դժվարությունների մասին։
16 տարեկանում մադրիդյան գրանդ տեղափոխվելուց հետո բրազիլացին բախվել է հանրային ուշադրությանն ու լուրջ ճնշմանը։
«Դա բարդ է։ Շատ բարդ… Երիտասարդները, որոնք կարծում են, թե փառքը միայն դրական կողմեր ունի, սխալվում են։ Ինձ համար դա ամենավատ բաներից մեկն է, քանի որ այլևս անձնական կյանք չունես։ Հույս ունեմ, որ մի օր կկարողանամ հանգիստ վայելել կյանքը», — նրա խոսքերն է մեջբերում AS-ը։
Ավելի վաղ Էնդրիկը ճանաչվել էր Ֆրանսիայի Լիգա 1-ի հունվարի լավագույն ֆուտբոլիստ։ «Լիոնի» կազմում անցկացրած վեց հանդիպումներում նա դարձել է հինգ գոլի և մեկ գոլային փոխանցման հեղինակ։ Transfermarkt-ը բրազիլացու տրանսֆերային արժեքը գնահատում է 25 միլիոն եվրո։
