Մեքսիկայի նախագահը երաշխավորել է ԱԱ-ի անվտանգությունը՝ նարկոկարտելի առաջնորդի սպանությունից հետո

Մեքսիկայի նախագահ Կլաուդիա Շեյնբաումը հայտարարել է, որ երկիրը պատրաստ է անվտանգության լիարժեք երաշխիքներ տրամադրել 2026 թվականի ֆուտբոլի աշխարհի առաջնության անցկացման համար։

Այս հայտարարությունը հնչել է երկրում ստեղծված լարված իրավիճակի ֆոնին։ Անցած կիրակի Մեքսիկայի զինված ուժերի հատուկ գործողության արդյունքում սպանվել էր երկրի խոշորագույն նարկոկարտելներից մեկի առաջնորդ Նեմեսիո Օսեգերան՝ «Էլ Մենչո» մականվամբ։ Դրանից հետո Մեքսիկայի մի քանի նահանգներում անկարգություններ են բռնկվել, իսկ կարտելի զինյալները բախումների մեջ են մտել կանոնավոր բանակի հետ։

Այսօր նախագահ Շեյնբաումը վստահեցրել է, որ առկա են «բոլոր երաշխիքները», որպեսզի երկիրը պատշաճ հյուրընկալի ԱԱ-2026-ի հանդիպումները։ Նա ընդգծել է, որ մրցաշարի այցելուների և երկրպագուների համար «ոչ մի ռիսկ» չի տեսնում։

Ավելի վաղ, Մեքսիկայում լարված իրավիճակի պատճառով հետաձգվել էին մարզական միջոցառումները։

Հիշեցնենք, որ 2026թ. Աշխարհի առաջնությունը կայանալու է հունիսի 11-ից հուլիսի 19-ը՝ ԱՄՆ-ում, Մեքսիկայում և Կանադայում։ Մեքսիկայում խաղերը հյուրընկալելու են Մեխիկոն, Մոնտերեյը և Գվադալախարան։