Լավագույնը լինելը մեծ պատիվ է, բայց քանի կա Մխիթարյանը՝ նա պետք է լինի առաջինը․ Սպերցյան
Հայաստանի ազգային հավաքականի և «Կրասնոդարի» առաջատար Էդուարդ Սպերցյանը Ֆյոդոր Սմոլովի «Smol Talk» YouTube-յան ալիքին տված հարցազրույցում պատմել է ազգային հավաքական հրավիրվելու, Ռոբերտո Մարտինեսի հետ հանդիպման և Հենրիխ Մխիթարյանի նկատմամբ ունեցած մեծ հարգանքի մասին։
Սպերցյանը նշել է, որ մեծ հաճույքով է միանում հավաքականին՝ հատկապես ուժեղ մրցակիցների դեմ խաղալու համար.
«Երբ տեսնում եմ, որ հրավեր եմ ստացել Հայաստանի հավաքականից, մեծ ցանկությամբ եմ մեկնում այնտեղ։ Խաղում եմ Խորվաթիայի, Պորտուգալիայի դեմ։ Պորտուգալիայի հավաքականի գլխավոր մարզիչ Ռոբերտո Մարտինեսը մոտեցավ ինձ, գրկեց ու ասաց. «Դու շատ լավ ֆուտբոլիստ ես»։ Մեծ հաճույք է խաղալ նման աստղերի դեմ։ Անկեղծ ասած՝ տեսնում ես, որ դա անհնարին չէ, պարզապես պետք է շատ մտածել ամեն մանրուքի մասին՝ փոխանցումների կուլտուրայի, դիրքի ընտրություն և այլնի մասին։ Նույնիսկ երբ նրանք մեզ խփում են հինգերորդ կամ վեցերորդ գոլը, միևնույն է՝ նրանց կարգապահությունը տեսանելի է։ Դա այն է, ինչ պետք է վերցնել նրանցից»։
Խոսելով Հայաստանի տարվա լավագույն ֆուտբոլիստ ճանաչվելու մասին՝ Սպերցյանը ցուցաբերել է մեծ համեստություն.
«Հաճելի է և մեծ պատիվ, որ ինձ ճանաչել են տարվա լավագույն ֆուտբոլիստ։ Բայց քանի դեռ կա այնպիսի ֆուտբոլիստ, ինչպիսին Մխիթարյանն է, նա պետք է մնա առաջին տեղում։ Հայաստանի լավագույն ֆուտբոլիստ դառնալն ավելի հեղինակավոր է, քան Ռուսաստանի լավագույնը լինելը, թեև Ռուսաստանում այդ մրցանակին արժանանալն ավելի դժվար է՝ մրցակցությունն է շատ»։
