Մեսսին կհանդիպի՞ Թրամփի հետ․ Ինտեր Մայամին պատրաստվում է պաշտոնական այցի դեպի Վաշինգտոն

«Ինտեր Մայամին», որը նախորդ տարեվերջին նվաճել էր MLS-ի գավաթը, պատրաստվում է պաշտոնական այցով մեկնել Վաշինգտոն։ Ըստ The Athletic պարբերականի՝ հաջորդ շաբաթ նախատեսվում է թիմի հանդիպումը ԱՄՆ նախագահ Դոնալդ Թրամփի հետ։

Սա կարող է դառնալ Լիոնել Մեսսիի առաջին այցը Սպիտակ տուն և առաջին հանդիպումը Թրամփի հետ։ Չնայած այցը նախատեսված է մարտի 7-ին կայանալիք «Դի Սի Յունայթեդի» դեմ խաղից առաջ, Մեսսիի ներկայացուցիչները դեռ պաշտոնապես չեն հաստատել արգենտինացի աստղի մասնակցությունը հանդիպմանը։

Հիշեցնենք, որ «Ոսկե գնդակի» ութակի դափնեկիրը նախկինում ևս հրավեր ստացել էր այցելելու Սպիտակ տուն․ 2025 թվականի հունվարին նախկին նախագահ Ջո Բայդենը նրան հրավիրել էր Ազատության նախագահական մեդալը ստանալու, սակայն Մեսսին չէր կարողացել ներկա գտնվել արարողությանը։

ԱՄՆ նախագահի նստավայր այցելելը տասնամյակների պատմություն ունեցող ավանդույթ է, որով երկրի ղեկավարությունը պաշտոնապես ընդունում է մարզիկներին։ Հանդիպման ժամանակ նախագահը շնորհավորում է թիմին, իսկ ակումբը, ի նշան երախտագիտության, նրան է նվիրում անվանական մարզաշապիկ։ Չնայած վերջին տարիներին այս արարողությունը երբեմն ուղեկցվում է քաղաքական հակասություններով կամ առանձին խաղացողների բացակայությամբ, այն մնում է ամերիկյան սպորտային մշակույթի ամենահեղինակավոր և խորհրդանշական իրադարձություններից մեկը։