Դե Ձերբին ընդունել է անգլիական գրանդի առաջարկը
Ռոբերտո Դե Ձերբին պատրաստ է հաջորդ մրցաշրջանում գլխավորել «Մանչեսթեր Յունայթեդը»՝ մերժելով «Տոտենհեմի» առաջարկը, հայտնում է TEAMTalk-ը։
46-ամյա մարզիչն արդեն տեղեկացրել է ակումբի ղեկավարությանը թիմը գլխավորելու իր համաձայնության մասին։ Այս որոշումը կարող է բարդացնել Մայքլ Քերիկի դրությունը, ով ներկայումս ժամանակավորապես կատարում է գլխավոր մարզչի պարտականությունները։
Իտալացին ընտրություն էր կատարում «Մանչեսթեր Յունայթեդի» և «Տոտենհեմի» միջև, սակայն մրցաշարային աղյուսակում լոնդոնցիների անորոշ դիրքը և հաջորդ մրցաշրջանում ակումբի ապագան ազդել են նրա որոշման վրա՝ հօգուտ «կարմիր սատանաների»։ Այս պահին Քերիկի պաշտոնանկությունը չի քննարկվում, սակայն ակումբի տնօրենների խորհուրդը նրան երբեք չի դիտարկել որպես մշտական լուծում՝ համարելով միայն ժամանակավոր միջոց։
Ներկայումս Դե Ձերբին ազատ գործակալի կարգավիճակում է, քանի որ այս տարվա փետրվարին հեռացել է «Մարսելից»։ Մինչև այդ նա մարզում էր անգլիական «Բրայթոնը»:
Քերիկի գլխավորությամբ անցկացրած 8 խաղերից 6-ն ավարտվել են հաղթանակով, ինչպես նաև գրանցվել է մեկական ոչ-ոքի ու պարտություն:
