Զավեն Հովհաննիսյանին 6-րդ անգամ վստահվել է տիտղոսային հանդիպում

Հայաստանի ֆուտբոլի ֆեդերացիան հայտարարել է, որ Զավեն Հովհաննիսյանը լինելու է Հայաստանի Սուպերգավաթի՝ «Նոա» – «Արարատ-Արմենիա» խաղի մրցավարը:

45-ամյա մասնագետն իր կարիերայում վեցերորդ անգամ կսպասարկի տիտղոսային հանդիպում։ Նախկինում նա երեք անգամ եղել է Հայաստանի գավաթի եզրափակչի մրցավարը, ինչպես նաև երկու անգամ սպասարկել է Հայաստանի Սուպերգավաթի մրցավեճը:

Ուշագրավ է, որ Հովհաննիսյանը եղել է 2019/20 մրցաշրջանի գավաթի եզրափակչի մրցավարը, երբ հանդիպել էին հենց «Նոան» ու «Արարատ-Արմենիան»: Այդ խաղն ավարտվել էր 5:5 հաշվով, իսկ հաղթողը որոշվել էր 11-մետրանոց հարվածաշարում:

Նախորդ անգամ Հովհաննիսյանը տիտղոսային հանդիպում սպասարկել էր 2021/22 թթ. մրցաշրջանի Հայաստանի գավաթի եզրափակչում:

Հակոբ Տոնոյանի անվան Սուպերգավաթի խաղը կկայանա մարտի 12-ին Վազգեն Սարգսյանի անվան «Հանրապետական» ստադիոնում: Խաղի մեկնարկը՝ 19:00-ին: