Մ23 ԵԱ․ Միքայելյանը կպայքարի ոսկու, Իբոյանն ու Խաչատրյանը՝ բրոնզի համար

Սերբական Զրենյանին քաղաքում ընթացնում է ազատ ոճի ըմբշամարտի Մ23 տարեկանների Եվրոպայի առաջնությունը։

Այսօր պայքարի մեջ են մտել Հայաստանի 5 ներկայացուցիչ։

61 կգ քաշային Լևիկ Միքայելյանը կիսաեզրափակիչում առավելության հասնելով թուրք Տոլգա Օզբեկի նկատմամբ՝ դուրս եկավ եզրափակիչ, որտեղ կգոտեմարտի ադրբեջանցի Ջեյհուն Ալլահվերդիևի հետ։ Ավելի վաղ Միքայելյանը պայքարից դուրս էր թողել Մոլդովայի ներկայացուցիչ Վասիլյե Մարկուին (4։1) ու բուլղարացի Էրդալ Գալիպին (1։1)։

74 կգ քաշային Գրիգոր Չոլակյանը պայքարը սկսեց որակավորման փուլից, որտեղ 4։0 հաշվով պարտության մատնեց իտալացի Ռաուլ Կասոյին։ Քառորդ եզրափակիչում Չոլակյանը վաղաժամ պարտվեց Ռուսաստանի ներկայացուցիչ Մագոմեդ Բայտուկաևին։ Վերջինս զիջեց կիսաեզրափակիչում՝ զրկելով Չոլակյանին բրոնզե մեդալի համար սփոփիչ գոտեմարտ անցկացնելու հնարավորությունից։

86 կգ քաշային Ռազմիկ Եփրեմյանը որակավորման փուլում 10։0 հաշվով ջախջախեց Իսրայելի ներկայացուցիչ Վլադիմիր Պլիևին։ Հաջորդ փուլում հայ ըմբիշը զիջեց ուկրաինացի Արթուր Կոստյուկին, որը կիսաեզրափակիչում պարտվեց, իսկ Եփրեմյանը լքեց պայքարը։

92 կգ քաշային Կնյազ Իբոյանը մեկնարկում 7։3 հաշվով առավելության հասավ Ուկրաինան ներկայացնող Եգոր Հորոխի նկատմամբ։ Քառորդ եզրափակիչում Իբոյանը զիջեց Ադրբեջանի ներկայացուցչին, որը հասավ եզրափակիչ։ Իբոյանը վաղը կանցկացնի սփոփիչ գոտեմարտեր՝ բրոնզե մեդալի համար։

125 կգ քաշային Խաչատուր Խաչատրյանը որակավորման փուլում 5։1 հաշվով հաղթանակի հասավ գերմանացի Էմիլ Թիելեի նկատմամբ։ Հաջորդ փուլում Խաչատրյանը 3։9 հաշվով զիջեց ադրբեջանցի ըմբիշին։ Վերջինս հասավ եզրափակիչ։ Խաչատրյանը ևս վաղը կպայքարի բոնզե մեդալի համար՝ անցկացնելով սփոփիչ գոտեմարտ։

Հիշեցնենք, որ երեկ պայքարի մեջ մտած 5 հայ ըմբիշներից 3-ը քիչ անց կմեկնարկեն բրոնզե մեդալի համար պայքարում։