Ռոդրին հայտնվել է սկանդալի կենտրոնում. հարևանները նրան մեղադրում են անձնական կյանքի ներխուժման մեջ

«Մանչեսթեր Սիթիի» կիսապաշտպան Ռոդրիի հարևանները դիմել են ոստիկանություն՝ մեղադրելով ֆուտբոլիստին անօդաչու թռչող սարքի (դրոնի) միջոցով «անձնական կյանքի ներխուժման» մեջ։

2024 թվականի «Ոսկե գնդակի» դափնեկրին տեսանկարահանել են այն պահին, երբ նա Մանչեսթերի կենտրոնում գտնվող իր պենտհաուսի պատշգամբից դրոն էր արձակում։ Շենքի բնակիչները պնդում են, որ սարքը կանգ է առել հենց իրենց պատուհանների դիմաց, և մտահոգություն են հայտնել իրենց գաղտնիության համար։ Այս մասին հայտնում է Daily Mail-ը՝ հղում անելով The Sun-ին։ Ոստիկանությունն արդեն սկսել է ստուգումները։

«Ես ապրում եմ բարձր հարկում, և վերջին բանը, որ ակնկալում եմ տեսնել հեռուստացույց դիտելիս, պատուհանիցս մեկ մետր հեռավորության վրա գտնվող դրոնն է։ Կինս շատ է անհանգստանում դրա պատճառով։ Այսքան բարձր ապրելու առավելություններից մեկն այն է, որ քեզ ոչ ոք չի հետևում, բայց հիմա մեզ բառացիորեն հետապնդում են Ռոդրին և իր դրոնը»,- ասել է բնակիչներից մեկը։

Մեկ այլ բնակիչ, ով ընկերուհու հետ ապրում է 34-րդ հարկում, պատմել է, որ մի երեկո հեռուստացույց դիտելիս պատուհանից այն կողմ թարթող կանաչ լույս են տեսել։ Նրա խոսքով՝ դրոնը վերադարձել է վերին հարկի պատշգամբ, որը պատկանում է Ռոդրիին։ Դրանից հետո աղջիկը զանգահարել է ոստիկանություն։