Այժմ պետք է ավարտենք առաքելությունը Լոնդոնում. Արտետան՝ Բայերի դեմ խաղից հետո

«Արսենալի» գլխավոր մարզիչ Միկել Արտետան խոսել է Չեմպիոնների լիգայում հանդես գալու դժվարությունների մասին՝ Լևերկուզենի «Բայերի» դեմ 1/8 եզրափակչի առաջին հանդիպումից հետո (1:1):

Պատասխանելով այն հարցին, թե արդյոք «Բայերի» հետ ոչ-ոքին հիշեցրեց մրցաշարի բարդության մասին, մարզիչը նշել է.

«Այո՛: Ինչպես նաև «Բայերի» հետ խաղը հիշեցրեց այն մասին, թե որքան դժվար է հաղթել ցանկացած մրցակցի այս մրցաշարում, հատկապես՝ մրցակցի հարկի տակ: Հետ նայելով՝ հասկանում ես, թե որքան մեծ աշխատանք ենք կատարել Չեմպիոնների լիգայում 8 անընդմեջ հաղթանակ տանելու համար: Դա այնքան բարդ է, որ նախկինում ոչ ոք նման բան չէր արել:

Մենք դա հիանալի հասկանում ենք, գիտակցում էինք «Բայերի» հետ խաղի կարևորությունը և մրցակցի բարդ լինելը: Այժմ մեզ անհրաժեշտ է ավարտին հասցնել մեր առաքելությունը Լոնդոնում», — Արտետայի խոսքերն է մեջբերում «զինագործների» պաշտոնական կայքը: