Բրունու Ֆերնանդեշը գերազանցել է Դևիդ Բեքհեմի ռեկորդը
«Մանչեսթեր Յունայթեդի» ավագ Բրունու Ֆերնանդեշը մեկնաբանել է Անգլիայի Պրեմիեր լիգայի մեկ մրցաշրջանում կատարած գոլային փոխանցումների իր ռեկորդը:
«Աստոն Վիլայի» դեմ խաղում (3:1) պորտուգալացին դարձավ 2 գոլային փոխանցման հեղինակ և ընթացիկ մրցաշրջանում իր ասիստների թիվը հասցրեց 16-ի՝ գերազանցելով Դևիդ Բեքհեմի սահմանած ակումբային ռեկորդը (15 գոլային փոխանցում՝ 1999/00 մրցաշրջանում):
«Ես ավելի հպարտ եմ, քանի որ դա արել եմ՝ օգնելով թիմակիցներիս: Ուրիշներին ուրախացնելը նույնպես հիանալի է: Խաղալով իմ դիրքում՝ ես շատ ուրախ եմ, որ կարողանում եմ գոլեր խփել և այդ պահին երջանիկ լինել: Սա հսկայական ձեռքբերում է ինձ համար, բայց գլխավոր նվաճումը կլիներ մրցաշրջանի ավարտին մրցաշարային աղյուսակի վերնամասում հայտնվելը:
Սա շատ կարևոր հաղթանակ էր, քանի որ մենք խաղում էինք անմիջական մրցակցի դեմ, և ունեինք հավասար միավորներ. միշտ հաճելի է առավելություն ստանալը: Նախորդ խաղից հետո մենք գիտեինք, որ հաղթանակ է պետք: Այսօր մենք կատարեցինք մեր աշխատանքը: Ես դեռ կարծում եմ, որ մենք կարող էինք ավելին անել, բայց խնդիրը լուծված է»,— ասել է Ֆերնանդեշը:
