Սենեգալը մեղադրում է CAF-ին կոռուպցիայի և Մարոկկոյին հաղթանակ նվիրելու մեջ․ Երկրի կառավարության ազդեցիկ հայտարարությունը
Սենեգալի կառավարությունը պաշտոնական հայտարարություն է տարածել՝ կապված Աֆրիկյան ֆուտբոլի կոնֆեդերացիայի (CAF) որոշման հետ, որով Աֆրիկայի գավաթի եզրափակչում Մարոկկոյին շնորհվել է հաղթանակ՝ չնայած Սենեգալի հավաքականի՝ 1:0 հաշվով խաղադաշտում գրանցած հաղթանակին։ Սենեգալին գրանցվել է տեխնիկական պարտություն՝ խաղի ժամանակ դաշտը լքելու պատճառաբանությամբ։
Հայտարարության մեջ մասնավորապես ասվում է.
«Սենեգալի կառավարությունն իր խորին վրդովմունքն է հայտնում Աֆրիկյան ֆուտբոլի կոնֆեդերացիայի բողոքարկման ժյուրիի կայացրած որոշման կապակցությամբ, որն ուղղված է Սենեգալի ընտրանուն 2025 թվականի Աֆրիկայի ազգերի գավաթի հաղթողի տիտղոսից զրկելուն և այն Մարոկկոյին փոխանցելուն։
Սա բացառիկ լրջություն ունեցող աննախադեպ որոշում է, որն ուղղակիորեն խախտում է սպորտային էթիկայի հիմնարար սկզբունքները, նախևառաջ՝ արդարությունը, ազնվությունը և մրցասպարեզում ձեռք բերված արդյունքի նկատմամբ հարգանքը։ Այն հիմնված է կանոնակարգի ակնհայտ սխալ մեկնաբանության վրա, ինչը հանգեցրել է իրավունքին կոպտորեն հակասող և անարդար որոշման։
Կասկածի տակ դնելով խաղի արդյունքը, որն ամբողջությամբ անցկացվել և որոշվել է խաղի կանոններին համապատասխան՝ CAF-ը լուրջ վնաս է հասցնում սեփական հեղինակությանը, ինչպես նաև խարխլում է Աֆրիկայի ժողովուրդների օրինական վստահությունը մայրցամաքային սպորտային ինստիտուտների նկատմամբ։
Սենեգալը չի կարող թույլ տալ, որ վարչական որոշումը ջնջի նվիրումը, արժանիքները և սպորտային վարպետությունը։ Երկիրը վճռականորեն մերժում է նվաճված տիտղոսից անարդարացիորեն զրկելու այս փորձը։
Սենեգալը կոչ է անում սկսել անկախ միջազգային հետաքննություն՝ CAF-ի ղեկավար մարմիններում կոռուպցիայի կասկածների առնչությամբ։
Բացի այդ, Սենեգալը մտադիր է օգտագործել բողոքարկման բոլոր հնարավոր միջոցները, ներառյալ դիմումը միջազգային իրավասու դատական ատյաններին՝ արդարության հասնելու և սպորտային արդյունքը վերականգնելու համար։
Կառավարությունը նաև առիթն օգտագործում է վերահաստատելու ամբողջ ազգի համերաշխությունը Սենեգալի այն քաղաքացիների հետ, ովքեր ձերբակալվել են Մարոկկոյում՝ Աֆրիկայի ազգերի գավաթի եզրափակչի ժամանակ տեղի ունեցած միջադեպերից հետո։ Այն լիովին մոբիլիզացված է իրավիճակը վերահսկելու համար՝ նպատակ ունենալով հնարավորինս սեղմ ժամկետներում հասնել դրա բարենպաստ լուծմանը։
Սենեգալը կմնա վճռական, զգոն և անկոտրում՝ պաշտպանելու իր ազգային հավաքականի իրավունքները և վերականգնելու աֆրիկյան սպորտի պատիվը»։
