Սպերցյանի ֆենոմենը. 2 քայլ՝ մինչ պատմական ռեկորդ

Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանը Ռուսաստանի Պրեմիեր լիգայի ընթացիկ մրցաշրջանի 22 խաղում արդեն գրանցել է 25 արդյունավետ գործողություն (գոլ + գոլային փոխանցում սխեմայով):

Ըստ Opta Sports-ի տվյալների՝ սա լավագույն ցուցանիշն է 22 տուրերից հետո՝ սկսած 2015/2016 մրցաշրջանից, երբ Սանկտ Պետերբուրգի «Զենիթի» հարձակվող Հալկը նույնքան խաղում դարձել էր 27 արդյունավետ գործողության հեղինակ:

Սպերցյանին ընդամենը 2 արդյունավետ գործողություն է հետ պահում «Կրասնոդարի» պատմական ռեկորդը կրկնելուց: 1 մրցաշրջանում արդյունավետ գործողությունների ակումբային ռեկորդը պատկանում է թիմի նախկին հարձակվող Ֆյոդոր Սմոլովին, որը 2015/2016 մրցաշրջանում գրանցել էր 27 արդյունավետ գործողություն:

22-րդ տուրից հետո «Կրասնոդարը» 49 միավորով գլխավորում է ՌՊԼ-ի մրցաշարային աղյուսակը՝ 1 միավորով գերազանցելով 2-րդ հորիզոնականում գտնվող «Զենիթից»: