Մեքսիկայում տոմսային խարդախության զոհ են դարձել հազարավոր երկրպագուներ

Մեքսիկա - Պորտուգալիա ընկերական հանդիպումը վերածվել է մասշտաբային խարդախության: Տոմսերի գները 600 դոլարից նվազել են մինչև 100 դոլար այն բանից հետո, երբ պարզ է դարձել, որ Կրիշտիանու Ռոնալդուն չի ժամանի Մեքսիկա:

2025 թվականի վերջին կողմերը պայմանավորվել են ընկերական հանդիպում անցկացնելու շուրջ։ Հանդիպման գովազդային արշավի հիմքում Կրիշտիանու Ռոնալդուն էր: Տոմսերի պաշտոնական գները տատանվում էին 150-ից 400 դոլարի սահմաններում:

Վաճառքի մեկնարկից րոպեներ անց տոմսերը սպառվել են, ինչն ուղեկցվել է համակարգային խափանումներով: Երկրպագուները նկատել են, որ տոմսերի հիմնական մասն «անհետացել է» պաշտոնական հարթակներից և հայտնվել սև շուկայում:

Վերավաճառողները գները բարձրացրել էին 10 անգամ՝ հասցնելով 500-3,000 դոլարի: Հնչեցին մեղադրանքներ, որ կազմակերպված խմբերը նախապես հասանելիություն են ունեցել տոմսերին՝ երկրպագուներին թույլ չտալով գնել դրանք:

Անցյալ շաբաթ Պորտուգալիայի հավաքականը հաստատեց, որ Ռոնալդուն վնասվածքի պատճառով բաց կթողնի խաղը: Քանի որ գնորդների մեծ մասի միակ նպատակը լեգենդար պորտուգալացուն տեսնելն էր, տոմսերի պահանջարկն ակնթարթորեն անհետացել է: