ԵՎՐՈ 2024-ից ի վեր 1-ին անգամ հավաքական հրավիրված Կիեզան լքել է Իտալիայի ընտրանու ճամբարը
Իտալիայի ազգային հավաքականի և «Լիվերպուլի» հարձակվող Ֆեդերիկո Կիեզան չի կարողանա օգնել ազգային ընտրանուն՝ մարտին կայանալիք վճռորոշ հանդիպումներում: Իտալիայի ֆուտբոլի ֆեդերացիան պաշտոնապես հաստատել է, որ 28-ամյա ֆուտբոլիստն առողջական խնդիրների պատճառով լքել է թիմի մարզաբազան:
Կիեզան հավաքական էր հրավիրվել 2024 թվականից ի վեր առաջին անգամ: Նրա վերջին խաղն ազգային թիմի կազմում ԵՎՐՈ 2024-ի 1/8 եզրափակիչն էր, որտեղ իտալացիները պարտվել էին Շվեյցարիային:
«Մարզումային կենտրոն ժամանելուն պես Ֆեդերիկո Կիեզայի ֆիզիկական վիճակի գնահատումից հետո որոշում է կայացվել, որ նա չի մասնակցի առաջիկա 2 խաղերին: Ակումբի հետ համաձայնությամբ նա հեռացել է հավաքականի ճամբարից», - նշված է ֆեդերացիայի հայտարարության մեջ: Կիեզային կփոխարինի «Բոլոնիայի» ֆուտբոիստ Նիկոլո Կամբյագին:
Ջենարո Գատուզոյի գլխավորած թիմը պատրաստվում է աշխարհի առաջնության ուղեգրի համար փլեյ-օֆֆ փուլին։ Մարտի 26-ին Իտալիան կմրցի Հյուսիսային Իռլանդիայի դեմ, հաղթելու դեպքում՝ 5 օր անց ԱԱ-ի ուղեգիրը կվիճարկի Ուելս-Բոսնիա և Հերցեգովինա զույգի հաղթողի հետ:
Ուղեգիր նվաճած հավաքականը տեղ կգտնի աշխարհի առաջնության A խմբում, որտեղ կմրցի Կանադայի, Կատարի և Շվեյցարիայի ընտրանիների հետ:
