Ռեալի սկանդալային հայտարարություններըլ՝ Վալվերդեի կարմիր քարտի հետ կապված

Մադրիդի «Ռեալը» հերթական անգամ խիստ քննադատության է ենթարկել Լա Լիգայի մրցավարական կոմիտեին: Պատճառը կիրակի երեկոյան Մադրիդի «Ատլետիկոյի» նկատմամբ տարած հաղթանակի (3:2) ժամանակ թիմի կիսապաշտպան Ֆեդերիկո Վալվերդեի ստացած կարմիր քարտն է:

Ուրուգվայցին ուղիղ կարմիր քարտ ստացավ Ալեքս Բաենային կոպիտ հնարքով կանգնեցնելու համար: Այժմ նա բաց կթողնի երկու խաղ՝ «Մալյորկայի» և «Ժիրոնայի» դեմ:

Խաղի ընթացքում «Ռեալը», պարտվելով 0:1 հաշվով, կարողացավ կամային հաղթանակ տոնել Վինիսիուս Ջունիորի դուբլի և Վալվերդեի գոլի շնորհիվ, սակայն Նաուել Մոլինայի պատասխան գոլից հետո իրավիճակը լարվեց, իսկ Վալվերդեն հեռացվեց դաշտից Բաենայի նկատմամբ կոպիտ խաղի համար:

Գլխավոր մրցավար Խոսե Լուիս Մունուերա Մոնտերոյի որոշումը հաստատվեց VAR-ի կողմից, իսկ արձանագրության մեջ նշվեց, որ ուրուգվայցին «հարվածել է մրցակցին՝ առանց գնդակին հասնելու հնարավորության և կիրառել է չափազանց մեծ ուժ»:

Ակումբի պաշտոնական հեռուստաալիքը տեղի ունեցածը որակել է «սկանդալ» և «խայտառակություն».

«Սա դասագրքային դեղին քարտ էր: Մրցավարը չփորձեց փչացնել դերբին, նա փորձեց փչացնել «Ռեալ Մադրիդը», ինչը նույն բանը չէ: Մեզ կփորձեն հիմարություններ վաճառել «ինտենսիվության» մասին, բայց Վալվերդեն չի հասնում գնդակին միայն այն պատճառով, որ Բաենան դիպչում է դրան ու հեռացնում այն»:

Թիմի գլխավոր մարզիչ Ալվարո Արբելոան, չնայած համաձայն չէր որոշման հետ, շնորհակալություն է հայտնել մրցավարին պարզաբանման համար.

«Ես այլ տեսակետ ունեմ կարմիր քարտի վերաբերյալ, բայց շնորհակալ եմ Խոսե Լուիսին, որ եկավ և բացատրեց իր որոշումը: Նա ասաց, որ Ֆեդեի գործադրած ուժը «չափազանց մեծ էր», բայց ես այդպես չեմ կարծում: Մրցակցին վնասելու միտում չկար: Մենք ցուցադրեցինք բնավորություն և կարողացանք վաստակել երեք միավոր», - նշել է Արբելոան:

Թեև Վալվերդեն չի մասնակցի Իսպանիայի առաջնության հաջորդ երկու խաղերին, նա պատրաստ կլինի Չեմպիոնների լիգայի քառորդ եզրափակիչի՝ «Բավարիայի» դեմ կայանալիք հանդիպմանը: