Մբապեն հրաժարվել է հետազոտվել Ռեալի բժիշկների մոտ

Կիլիան Մբապեն հրաժարվել է հետազոտվել Մադրիդի «Ռեալի» բժշկական անձնակազմի կողմից։

Ինչպես հայտնում է L’Équipe-ը, մարտի սկզբին ախտորոշումը ստանալուց հետո Մբապեն զանգահարել է «Ռեալի» նախագահ Ֆլորենտինո Պերեսին և հայտարարել, որ այլևս չի ցանկանում գտնվել ակումբի բժիշկների հսկողության տակ։ Ֆուտբոլիստը նշել է, որ բուժումը շարունակում է միայն Քրիստոֆ Բոդոյի մոտ, ում հետ համագործակցել է դեռ ՊՍԺ-ում։

Ըստ հրապարակման՝ հենց Բոդոն է սահմանել ֆրանսիացու ծնկի վնասվածքի բուժման վերջին արձանագրությունը։

Հիշեցնենք, որ ավելի վաղ լուրեր էին տարածվել, որ «Ռեալում» փորձել են բուժել Մբապեի այն ոտքը, որը վնասված չէր։

Ավելի ուշ Կիլիանը հանդես էր եկել հերքմամբ՝ նշելով. «Տեղեկությունն այն մասին, թե ինձ մոտ հետազոտել են ոչ այն ծունկը, չի համապատասխանում իրականությանը»։

Այնուամենայնիվ, շուտով Ռիոլոն արձագանքել է ֆուտբոլիստի խոսքերին. «Նա ստել է, ես հաստատում եմ այդ տեղեկությունը 1000%-ով։ Նա պարզապես չի ցանկանում վնասել «Ռեալի» հեղինակությանը, որն այս իրավիճակում ծիծաղելի տեսք ունի»։