Բարսելոնայի բոլոր ֆուտբոլիստներն էլ բացառիկ են․ Դիեգո Սիմեոնե

Մադրիդի «Ատլետիկոյի» գլխավոր մարզիչ Դիեգո Սիմեոնեն խոսել է Լա Լիգայի 30-րդ տուրի «Բարսելոնայի» դեմ հանդիպման մասին.

«Ֆուտբոլն առաջին հերթին կախված է ֆուտբոլիստներից. բացի մարզիչների գաղափարներից, հենց խաղացողներն են իրենց մակարդակի և որակի շնորհիվ վճռում նման հանդիպումների ելքը: Իրենց մարզչի գալով նրանք շատ լավ են գործում՝ պաշտպանության բարձր գծով և մենապայքարներում հաղթելու ձգտումով: Մենք էլ արդեն 14 տարի խաղում ենք՝ ելնելով մեր առանձնահատկություններից և կշարունակենք աշխատել՝ մրցունակ մնալու համար: Նրանց բոլոր ֆուտբոլիստներն էլ վտանգավոր են, քանի որ բացառիկ են: Նրանք կարողանում են խաղալ մրցակցի կիսադաշտում և քեզ մտածելու ժամանակ չեն տալիս: Նրանք դա անում են յուրաքանչյուր խաղում, իսկ դա շատ բարդ է. խաղում են պաշտպանության բարձր գծով և դիմում են ռիսկի: Մենք պետք է խաղն այնպես կառուցենք, որ կարողանանք վնաս հասցնել նրանց», — ասել է Սիմեոնեն:

Լա Լիգայի 30-րդ տուրի «Բարսելոնա»-«Ատլետիկո Մադրիդ» հանդիպումը կկայանա վաղը՝ ապրիլի 4-ին և կմեկնարկի 23։00-ին։